ЦIалдохъаби кIодо гьаруна

ГIолилаз бихьизабуна жидерго лъайги махщелги

Дагъистаналъул бетIерасул ишал тIуралев Владимир Васильев данд­чIвана тIолгороссиялъул олимпиадабазул призерал ГIабдулкъадир Бучаевгун (математика), Замир ГIа­шурбеговгун (информатика), Му­хIамад МухIамадовгун (ОБЖ) (гьев ккола ЦIумада районалъул ТIин­ди росулъа), «ЧIагояб классика» кон­курсалда бергьарай Фатима Ми­кагIиловагун, гьезул учительзабигун ва эбел-эменгун.
Республикаялъул нухмалъулес, цIал­дохъабазда бергьенлъиги баркулаго, абуна:
— КIудияб баркала буго нужее камилаб лъаялъухъги бергьенлъабазухъги. Дир ракIчIола гьаб гIумруялда нужеда нужерго бакI батизе букIиналда. Масала, нуж тохтурзабилъун рахъа­ни, унтарал рукIине руго талихIал гIадамаллъун, учительзабилъун рахъани — гьебги цIалдохъабазул талихI, архитектораллъун нуж ругони, гьебги шагьаралъул яги росабазул гIадамазул талихI. Гьединго баркала кьезе бокьун буго нужер учительзабазе ва эбел-инсуе. Нужер бергьенлъабазулъ гьезулги буго цо бутIа, — ян.
Жидер лъималазул гьабураб адабалъухъ умумузул рахъалъан рес­публикаялъул нухмалъулесе баркала кьуна ГIабдулкъадир Бучаевасул эмен, ДГУНХялъул ректор ЯхIя Бучаевас.
ДандчIваялъул ахиралда Владимир Васильевас, цIалдохъабазе кьуна тIад цIар хъварал сагIтал, гьезул учительзабазе — ДРялъул бетIерасул баркалаялъул кагътал.
ДРялъул бетIерасулги хIукуматалъулги пресс-хъулухъ