Гьеб букIине буго кIудияб спортивияб байрамлъун
Исана 30 апрелалдаса анкьабилеб маялде щвезегIан гугариялъул лъабго къагIидаялъул рахъалъ Каспийскалда тIобитIизе бугеб Европаялъул чемпионат тIадегIанаб даражаялда ине букIиналда щаклъи гьечIо республикаялъул физкультураялъул ва спорталъул министрасул ишал тIуралесул заместитель Зайнал СалахIудиновасул ва Олимпиялъул категориялъул судья ГIубайдула ГIусмановасул. Гъоркьиса декабралъул ахиралда журналистазе гьез бицана гьел къецазде хIадурлъиялъул хIакъалъулъ.
— Чемпионат тIобитIизе буго спорталъул ва гIолилазул кIалгIаялъуб, — ан абуна СалахIудиновас.
— Дагъистаналде бачIун букIана UWWаялъул лъабго комиссия. Гьез халгьабуна спортивиял объектазул, спортсменал ва судьяби жанир рукIине ругел гостиницабазул, аэропорталъул ва цогидалъул. ГIаммаб къагIидаялъ гьез лъикIаб къимат кьуна хIадурлъиялъе.
Спортивияб кIалгIаялъур гьаризе комиссиялъ рихьизарурал хIалтIаби гьарулел руго. Гьединал къецал Северияб Кавказалда тIоцере тIоритIулел руго, ва нижер кIудияб жавабчилъи буго гьел тIадегIанаб даражаялда тIоритIиялъул рахъалъ. ТIадежоялъе, Россиялъул спортсменал Олимпиялъул хIаязда гIахьаллъизе риччазе гьечIилан харбалги руго. Гьединлъидал Дагъистаналда тIобитIизе бугеб Европаялъул чемпионат спортивияб лъугьа-бахъиналдаса сверулеб буго спортивиябгун политикияб лъугьа-бахъиналде.
ГIубайдула ГIусмановас абуна чIахIиял спортивиял тадбирал, гьездаго гъорлъ халкъазда гьоркьоселги, тIоритIиялъул рахъалъ нилъер республикаялъул кIудияб хIалбихьи бугилан.
— Нилъер рес буго, спортивияб инфраструктура хIадур гьабиялъул рахъалъ UWWялъ рихьизарурал цо-цо гIунгутIаби хехго лъугIизаризе. Абизин, гьабсагIат гугариялъул рахъалъ дунялалъул чемпионат тIобитIизе нагагьлъун нилъее рес кьуни, гьелъие кинабго хIадурго букIине буго. Дагъистаналда тIобитIизе бугеб Европаялъул гьеб чемпионаталъул церехун тIоритIараздаса батIалъи букIине буго, гугариялъул щибаб къагIидаялда гIахьаллъулезул къадар микьгоялдаса анцIгоялде щвезегIан цIикIкIине букIиналъулъ. Дагъистаналда букIине буго гугариялъул кIудияб байрам. Европаялъул чемпионаталъул тарихалда бищунго лъикIаб чемпионатлъун гьеб лъугьине букIиналда дир щаклъи гьечIо, — ян абуна ГIусмановас.
Журналистаз гьарана UWWялъул комиссиялъ рихьизарурал гIунгутIабазул бицеян.
— Гьезул бихьизабиялда рекъон, ГIали ГIалиевасул цIаралда бугеб Спортивияб кIалгIаялъуб 10 метралдаса 30-ялде щвезегIан гIатIид гьабуна разминкаби гьарулеб зал, — ан бицана СалахIудиновас. – Гьениб гьанже буго тренировкаби гьаризе ункъо ургу. Спортивияб кIалгIаялъуб кIиабилеб тIалаялда гIуцIизе буго 20х40 роценал ругеб пресс-центр. Гьенирго лъезе руго мониторал, хIалтIизе буго Интернет. Журналистазе букIине буго 110 чиясе бакI бугеб хасаб трибуна.
Европаялъул чемпионат тIобитIилелде цебе ГI. ГIалиевасул цIаралда бугеб Спортивияб кIалгIаялъул залалъуб тIобитIизе буго республикаялъул лъабго турнир, гьездаго гьоркьоб Дагъистаналъул чемпионатги. Гьел турнирал рукIине руго Европаялъул чемпионаталде хIадурлъиялъул байбихьилъун. Гьенир ккарал гъалатIалги хIисабалде росун, хIадурлъизе руго Европаялъул чемпионаталде.
Ярыгинил турниралде щал ине ругел?
Эркенаб гугариялъул рахъалъ Гран-при «Иван Ярыгин» абураб турниралде хIадурлъулеб буго Дагъистаналъул тIасабищараб команда. Дагъистаналъул гугарухъабазе гьеб букIине буго 30 апрелалдаса 7 маялде щвезегIан Каспийскалда тIобитIизе бугеб эркенаб гугариялъул рахъалъ Европаялъул чемпионаталде гугарухъаби тIасарищиялъулаб байбихьилъун.
Гьелда гIахьаллъулев вуго миллияб командаялде вачарав 50 къуватав гугарухъан. Амма Красноярскалде щив иневали жеги мухIканго лъаларо. Гьениб бугеб ахIвал-хIалалъул хIакъалъулъ бицана Дагъистаналъул тIасабищараб командаялъул бетIерав тренер Сажид Сажидовас: «Киналго гIолохъаби ургуялда хIалтIулел руго тIадчIун, кIудияб гъира-шавкъалда. Киназулго хьул буго исанасеб сезоналъул байбихьуда бергьенлъабигун церерахъине ва ихдал Каспийскалда тIобитIизе бугеб Европаялъул чемпионаталда гIахьаллъизе рес щвеялъе гIоло къеркьезе. Амма «Иван Ярыгинил» Гран-приялда щал гIахьаллъизе ругелали нижеда жеги мухIканго лъаларо. Цересел соназда, къецал байбихьилелде, цебеккунго нижехъе битIун бачIунаан турниралда гIахьаллъиялъе ихтияр кьурал гугарухъабазул сияхI ва гьезул рес букIунаан гIодориччан къецазде хIадурлъизе. Исанайин абуни, турниралда гIахьаллъизе риччарал гугарухъабазул хIакъалъулъ, кинабгIаги хасаб лъазаби нижехъе бачIинчIо ва цо-цо баянал нижехъе щвана прессаялдасан. Амма гьел руго мухIканлъи гьечIел. Масала, щай гъоркьиса тIобитIараб «Аланы» турнир лъугьараб исанасел къецазде гугарухъаби тIасарищиялъулаблъун ва щиб ккезе бугеб гьенире ине цIарчIварал, амма жидерго цIайиялъул категория хисизабизе, ай батIияб цIайиялда гугаризе хIукму гьабурал спортсменазул. Дида бичIчIула, гугариялъул правилабазда гIемерал хиса-басиял гьарун, гьездаго гьоркьоб Ярыгинил турнир тIобитIиялъул рахъалъ низамги хисизабун букIин. Халкъазда гьоркьосеб гьеб турниралда гIахьаллъизе Россиялъул вакиллъун вукIине вуго щибаб цIайиялъул щу-щу гугарухъан. Гугариялъул исанасеб сезон байбихьулеб буго, амма ричIчIуларел суалал ва масъалаби гIемерал руго. ГIагарлъулеб буго Европаялъул чемпионаталде гугарухъаби тIасарищизе заман ва ракIчIун абизе кIола, ишалдехун гьадинаб бербалагьи гьабуни, цIи-цIиял бергьенлъаби нилъеее щвезе гьечIин…»
Гран-при «Иван Ярыгин» турниралда гIахьаллъизе ихтияр щварал гугарухъабазул тIоцебесеб сияхIалде ккечIезул рес буго, 18 январалда байбихьараб Миндиашвилил Академиялъул призазе гIоло Красноярскалда тIобитIизе бугеб тIасарищиялъулаб турниралда гIахьаллъизе. Гьенир финалалде рахъаразе рес щвезе буго Ярыгинил турниралда гIахьаллъизеги.