Стадионалда рукIана ветераналги гIолилалги

Къецал рагьи гьелъул гIахьал­чагIазда баркана Дагъистаналъул хIукуматалъул председателасул тIоцевесев заместителасул ишал тIуразарулев Анатолий Карибовас.

«ТIадагьаб атлетика ккола «Спорталъул къирал». Гьеб машгьураб буго нилъер республикаялдаги, ва щибаб соналдасан цIикIкIунеб буго гьелда гIахьаллъулезул къадарги. ТIадагьаб атлетикаялъ лъадарула черх ва спортивияб хасият, гьеб ккола сахаб гIумру гьабиялъе гIолилазе лъикIаб мисаллъун. КIудияб кIвар буго гьелъул тIаде гIолеб гIел спорт бокьулеблъун куцаялъеги», — ян бихьизабуна Карибовас.
Гьесул рагIабазда рекъон, къецал тIоритIиялъул мурад ккола республикаялда тIадагьаб атлетикаялъул спортивиял тайпаби цIигьари ва церетIезари.
«Стадион цIигьабун къачIаралдаса нахъе нилъее рес ккана тIадагьаб атлетикаялъул къецал тIадегIанаб даражаялда тIоритIизе. ЛъикIал хIасилал ккеялъул мурадалда тIоритIизе ккола хIалкIванагIан цIикIкIун тIадагьаб атлетикаялъул къецал», — ан абуна Карибовас.
Хадуб кIалъай гьабурав республикаялъул физкультураялъул ва спорталъул министрасул ишал тIуразарулев МухIамад МухIамадовас абуна Дагъистаналъул тIадагьаб атлетикаялъул школалъул реццалъе мустахIикъал жидерго гIадатал ругилан.
«Республикаялъул тIадагьаб ат­летикаялъул спортсменал мус­тахIикъаб къагIидаялъ цере ра­хъана халкъазда гьоркьосел ва тIол­гороссиялъул спортивиял аренабазда, ва гьез кIудияб бутIа лъуна улкаялъул тIадагьаб атлетика цебетIезабиялъулъ. ТIадегIанал хIасилал ккана ГIали ГIисаевасул (диск рехун), Юрий Большовасул, Владимир Шабановасул (кIанцIун). Гьаний рехсезе ккола олимпиялъул кIицIул чемпионка, гIергун кIанцIулей Елена Исинбаеваги», — ян абуна МухIамадовас.
ТIадагьаб атлетикаялъул кубокалъе гIоло къецазул программаялда рукIана: батIи-батIиял манзилазда рекери, гIебеде кIанцIи, ядро тунки, диск рехи ва эстафеталъулаб рекери.
ТIоцебесеб бакI щвана Ма­хIач­хъалаялъул командаялъе, кIиабилеб бакI — Дербенталъе, лъабабилеб — Каспийск шагьаралъул командалъе.
Ветераназда гьоркьов Россиялъул чемпион ХIайбула Арбулиевасе кIиабилеб бакI щвана ядро тункун. ГIебеде кIанцIун бергьана Дербенталдаса Диана Ибрагьимова (5.23 метр). 200 метралъ эстафетаялда векерун чIел босана МЧСалъул хIалтIухъан Ренат Амраховас.

 

Лъабгоялъул кIиго «месед» — дагъистаниязе
Чемпионаталда гIахьаллъана 900 спортсмен

Халкъазда гьоркьосеб ушуя­лъул федерациялъул кверщалида гъоркь гьеб чемпионат Россиялда тIобитIана тIоцебесеб нухалъ. Казаналда тIобитIараб гьеб гIуцIун букIана ушуялъул аслияб кIиго бутIаялдаса: саньда (гьелда гьоркьоре уна кикбоксингалъул элементал, хIатIаз ва квераз цоцазда кьаби ва партералда гугари) ва таолу (ушуялъул батIи-батIиял ­къагIидабазул комплексниял упражнениял ва акробатикиял элементал). Россиялъул тIасабищараб команда гIуцIун букIана машгьурал спортменаздаса. Командаялда гIемерисел рукIана Дагъистаналъул ушуялъул школазда куцарал спортсменал. Командаялъе бетIерлъи гьабулеб букIана бищунго цIар рагIарал спортсменазул цояв – ушу-саньдаялъул рахъалъ дунялалъул щуцIул чемпион, 90 килограмм цIайиялда къецазда гIахьаллъулев Бозигит Атаевас. Гьесда хадур унел рукIана Арслан Бектемиров (80 кг), ИсмагIил ГIалиев (75 кг), АсхIаб ТIалхIатов (65 кг) ва ГIали МухIамадов (60 кг).
Россиялъул тIасабищараб командаялъе чемпионаталда щвана анкьго медаль: лъабго меседил, кIиго гIарцул ва кIиго мазгарул. Лъабгоялъул кIиго меседил медаль щвана дагъистаниял ГIали МухIамадовасе ва Арслан Бектемировасе. Финалалда гьев кIиявго бергьана Югалъулаб Кореялъул спортсменаздаса.