Заманалда рекъон хIалтIизе ругьунлъулел руго
Россиялъул Журналистазул союзалъ Дагомысалда тIобитIараб журналистазул ХХI фестивалалда гIахьаллъана Россиялъул тIолалго регионаздаса ва къватIисел пачалихъаздаса журналисталги, политикалги, гIалимзабиги, публицисталги, режиссералги, продюссералги, актералги. Фестивалалъул тIоцебесеб къоялда тIобитIараб данделъиялда гьоркьоб лъун букIана жакъа газет-журналал чIаго хутIизе рес бугищ абураб суал.
Россиялъул, Сириялъул, Украинаялъул ва Латин Америкаялъул цIар арал журналистаз мастер-классал рихьизарулел рукIана фестивалалда гIахьаллъулезда. Гьединго фестивалалда журналистазе рагьун букIана он-лайн лаборатория, гьениб малъулеб букIана социалиял гьиназда кин хIалтIизе кколебали. Цебе дунялалда кколебщинаб жо газетаздаса, радиоялдаса яги телевизоралдаса лъалеб букIун батани, гьанже халкъалда цIияб хабар лъазабулеб бакIлъун лъугьун буго Интернет. Жакъасеб гIелалъ, Интернеталдаса цIалун гуреб, газетаздаса гIемер пайда босулеб гьечIин, гьединлъидал журналистал ругьунлъизе кколин Интернеталъул кумекалдалъун гIадамазухъе информация щвезабизеян рикIкIунеб буго гьез.
Форумалда бицана журналистазе кумекалъе Пачалихъияб Думаялъул депутатаз хIадур гьарулел ругел законазул проектазул хIакъалъулъги. Гьединазул цояблъун ккола рагъулал тунка-гIусиял унел ругел бакIазда хIалтIулел мухбирзаби цIуни. Нагагь гьединаб бакIалда журналист лъукъани, гьесие гIарцулаб компенсация кьезе кколин рикIкIунеб буго депутатаз.
Журналистазул фестиваль рагьулаго, Россиялъул Журналистазул союзалъул председатель Всеволод Богдановас абуна щибаб соналда тIоритIулел журналистазул дандчIваял РФялъул президентас рикIкIунин кIвар бугеллъун ва журналистазул махщел гIатIид гьабулеллъун.
Фестивалалъул программаялда рекъон тIобитIана «Бищунго лъикIаб социалияб проект», «Бищунго лъикIаб дизайн», «Бищунго лъикIав репортер» абурал конкурсалги. Гьенибго тIобитIана Дагъистаналъул газеталгун журналазул, халкъиял махщелчагIаз гьарурал тIагIелазул выставкаги.
«ТIолабго Россия» ТIолгороссиялъул фестивалалда тIобитIана «РФялъул миллияб политикаялъул стратегия гIумруялде бахъинабиялъулъ СМИязул кIвар» абураб гургинаб стол. Гьениб бицана Россиялъул халкъазул бухьенал щулалъизариялъулъ миллияб прессаялъул бугеб кIваралъул хIакъалъулъ.
Данделъи нухда бачана ДРялъул Журналистазул союзалъул председатель ГIали Камаловас.
ПатIимат СултIаемухIамадова