Дагъистаналда ралел гIемертIалаял минабазул бащдалниги рукIине кколел тIалабалги цIуничIого ралел ругин ахIи балеб буго экспертаз. 2025 соналда гьединаб 468 объект тIатинабунин лъазабун букIана СКФОялъул бакIал ралезул гильдиялъул пресс-хъулухъалъ.
«ГьабсагIаталда республикаялда балеб буго 959 гIемертIалаяб мина. Гьезул 468-яб балеб буго законалъул тIалабалги цIуничIого», — ян хъвалеб буго гьезул лъазабиялда.
Ралел бакIазул, архитектураялъул ва ЖКХялъул министерствоялъул сайталдаги буго рукIине кколел тIалабалги цIуничIого рарал ва ралел бакIазул сияхI. Гьединал объектал республикаялда, хасго тахшагьаралда, соналдаса соналде цIикIкIунелги руго. Гьале дагьаб цебе тIатинабуна, законалъул тIалабалги цIуничIого, «Ар групп» компаниялъ 16 гIемертIалаяб мина балеб букIин. Изну гьечIого кьучI лъураб гIечIого, гьез жеги разего рачIел минабахъ цо-цо квартира бичулеб букIун буго чанго чиясе. Гьедин кIиазаргоялдасаги цIикIкIун чи махсарадеги ккун вуго. Рехсараб компаниялъ гIадамазухъа бакIарун буго гIага-шагарго 2 миллиардалдасаги цIикIкIун гъурущ ва гьебго заманалда цониги объект лъугIизабунги гьечIо.
Щайха гьеб хIалалде ккезегIан течIого, иргадулаб «пирамида» тIатинабичIеб? Щай жавабчилъи тIаде кколел идарабазда гьеб бихьичIеб? Щай цо гуреб, кIиго гуреб, 16 объект балеб компаниялъ цонигияб рагIа-ракьанде щвезабун бугищали лъицаго цIех-рех гьабичIеб? Суалал гIемерал руго, амма жавабал щолел гьечIо.
Застройщикасда сверухъ лъугьараб ахIвал-хIалалъул ва компаниялъ гуккарал гIадамазул квартирабазул хадусеб къисматалъул цIехон Дагъистаналъул ралел бакIазул, архитектураялъул ва ЖКХялъул министерствоялде щведал, гьениб бицана:
«Рехсараб компаниялъул нухмалъулелда тIад гьабун буго уголовияб дело, кватIичIого букIине буго суд. Халкъалъе ккун буго кIудияб зарал ва гьеб иш гьедин тезе ракIалда гьечIо. Гьелъул цIех-рех гьабулеб буго жавабиял идарабаз ва гIайибиязе тамихIги гьабила. Квартира босулелъул кинал суалазде кIвар буссинабизе кколебали нижеца гIемер бицуна, кинабго министерствоялъул сайталдаги социалиял гьиназдаги букIуна. Амма, сундухъго балагьичIого, пуланал чагIазул маргьабаздаги божун, квадратиял метраби росулездаги гIажаиблъи гьабизе бачIуна. Рес ккун букIаго, цоги нухалдаги лъазабулеб буго, документазул рахъалъ щаклъи ккарал суалал цIехезе рачIа министерствоялде, ракке сайталде», — ян.
Гьал къоязда Дагъистаналъул бетIер Сергей Меликов ва РФялъул Пачалихъияб Думаялъул депутат СултIан ХIамзаев дандчIана «Ар групп» компаниялъул пайщикалгун. ХIакимзабаз рагIи кьуна гIагараб заманалда гIадамазе кумек гьабизе.
Ралел бакIазул компанияз махсараде ккуразулалдасаги роцIинабизе захIматаблъун бихьула низам гьечIого ралел, хасго МахIачхъалаялда, минабазда сверухъ лъугьун ругел суалал. 500-600 азарго чияс жаниб гIумру гьабизе гурого шартIал гьечIеб тахшагьар ахирал соназда рарал минабаз, битIахъе, «цIунцIрабазул гохIлъун» лъугьана. Миллион чиясе гIураб ток, лъим, канализация, газ, нухал ва цогидал шартIал МахIачхъалаялда гьечIо. Гьелде тIадеги, гIемертIалаял минаби ралелъул компанияз хIисабалде босулеб гьечIо ракь багъариялъул рахъги. 7-8 баллалъул къуваталда ракь багъарани, тахшагьар тIатIала ккезе бегьулин ахIи балеб буго сейсмологаз.
ТЕМИРХАН ХIАСАНОВ
