Дагъистаналъул нухмалъулев дандчIвана районазул бутIрулгун
29 ноябралда ДРялъул бетIерасул ишал тIуралев Владимир Васильев дандчIвана ЦIумадаги ЛъаратIаги районазул бутIрулгун. АнвархIажи Вечедовасги (ЦIумада) Ражаб Ражабовасги (ЛъаратIа) гьесие бицана районазул социалиябгун экономикияб хIалалъул хIакъалъулъ.
АнвархIажи Вечедовас бицана ЦIумада районалъул аслияб магIишатлъун боцIухъанлъи кколин. Гьелдаго цадахъ цIумадисез гIезарула могьолалгун тIоролал культурабиги, овощалги, гIисинпихъги. Районалъул бетIерасул рагIабазда рекъон, исана тIоцебесеб нухалда бекьун букIана пиринчIги.
Ражаб Ражабовас мухIканго бицана налогал ракIариялъулги муниципалитеталъул ишазулги хIакъалъулъ. Районалъул ракьазул хIисаб гьабун бахъанин ва гIисинал бизнесменазул налогазул идарабазда хъвай-хъвагIайги гьабунин абуна гьес.
Республикаялъул нухмалъулесухъеги улкаялъул президентасул цIаралдаги лъаратIисез хъван рачIарал гIарзабазулгун хитIабазул папка кьуна Владимир Васильевас Ражабихъе ва гьезул халгьабеянги тIадкъана.