Мухlамадова Аминат, 4 курсалъул ДГУялъул ОЖялъул студентка 

 

Данделъи рагьулаго, Меликовас баркала кьуна министразе — лъабабилеб декабралъ  росдал магlишаталъул хlалтlухъанасул къоялда хурхун гьез гlуцlарал тадбиразухъ. 

Унеб соналъул цереккунисел хlасилал данде росана росдал магlишаталъулгун продовольствиялъул министр Мухтарбий Аджековас. Авлахъалда гьарулел  хlалтlабазул сезон жиндир заманалда лъугlанилан бицана гьес. 

 

Аджековасул рагlабазда рекъон,  бекьараб ракьалъул бакl исана бащалъана 372 азарго гектаралда. Гъоркьияб соналда данде, гьеб ккола 12,3 азарго гектаралъ цlикlкlун. 

 

Исана пайда босана цебе хlалтlизе гьабулеб букlинчlеб ракьалъул 5,4 азарго гектаралдаса. Гьединго ракьул бетlергьабаз босун буго росдал магlишаталъул техникаялъул 262 алат. 

 

Бекьараб бакlалъул 40,3 азарго гектаралдаса 1,5 миллион тонна пастlадул нигlматазул бакlарун буго. Бачlунеб соналъ  ракlалда буго 42 азарго гектаралде щвезегlaн гьеб кlодо гьабизе. 

 

Гlаммаб тIощел бакIари исана бащалъизе ккола 220 азарго тоннаялда. Церетlолел руго Россиялда бищун кlудиял (1,3 азарго гектар) Дагъистаналъул фундукалъул ахалги — хасалихлъиялъ рекьаралги рикlкlун, гьезул къадар ккола кlиазарго гектар. 

 

Гlатlилъана пиринчl гlезабиялъул бутlаги — гlаммаб пиринчlалъул бакlари бащалъана 138 азарго тонналда. Бекьараб бакlалъул къадар исана 19 проценталъ цlикlкlана ва 32 азарго гектаралда бащалъана. 

 

Боцlул гlаммаб къадаралъул рахъалъанги Дагъистан бищун цебе ине буго.

 

Аграрияб промышленносталъул гlелмуялъул бицине цевевахъана аграрияб гlелмияб централъул директорасул тIадал ишал тIуразарулев Нариман Нигlматулев. Гьесул рагlабазда рекъон, Дагъистаналда гlезабун буго гlиял тайпа — «артлухский меринос» (тIеренаб хъахIаб квасул тайпаялъул гIи). Мугlрул ракьанда гlумру гьабизе ругьунал рагlула гьел. 

 

«Кутакалда бечедаб, къанагlатаб регион  букlиналъ, Дагъистаналда кlола къватlисан бачlунеб гlемераб къайи хисун, жинцаго гьеб хlaдуризе», — ян абуна Меликовас. 

 

Данделъиялъул ахиралда гьес  АПКялъе  гlоло хIажатал ва чlванкъотlарал тадбирал тlоритlеян аманат гьабуна. 

 

 

Гьединго Дагъистаналъул премьер-министр Гlабдулмуслим Гlабдулмуслимовасе гьес баркалаги кьуна пайдаяб ва хlасил бугеб хlалтlи гьабуралъухъ.