1957 соналда бахъараб сурат. МахIачхъалаялъул медучилищеялъул художественнияб хIаракатчилъиялъул гIахьалчагIи
Гьаб сурат редакциялде битIун бачIана газеталъул цевегосев гьудул, мухбир, гIемерал соназ Гъизилюрт шагьаралъул больницаялда хIалтIарав ТIалхIат Ахъбердиевас. Гьелъие гIиллалъунги ккун буго Хунзахъ районалъул ТIануси росулъа НурмухIамадова СаихIатица жиндирго кIодоэбел Сапинатил хIакъалъулъ хъвараб хабар газеталъ лъазабураб конкурсалде битIи. Бихьулищха – Сапинатги ТIалхIатги цадахъ цIалулел рукIун руго МахIачхъалаялда, медучилищеялда.
— Макъалаги Сапинатил суратги бихьидал, дун цIидасанги гIолохъанал соназухъе тIадвуссана. Пикрабиги гьелчана каранда, ракIалдещвеязги квелъ бана. Дие цIакъ бокьилаан гьаб суратги газеталда бахъани ва гьанир ругел дир курсцоязда цадахъ цIалулел рукIараб заманги ракIалде щвезабизе. Гьаб сураталъ дида цоги нухалда ракIалде щвезаруна училищеялда тIоритIулел рукIарал тадбирал. Гьез бигьа гьабулаан нижее цIалиги, — ян хъвалеб буго ТIалхIатица.
Сураталда: ТIалхIат Ахъбердиевас хъвалеб буго балалайка. Гьесда аскIой – Гъуниб районалдаса Жапарат.
Рахъун чIарал: квегIиса квараниде: Хунзахъ районалъул ГIободаса СултIанахIмад МухIамадов, Хунзахъ районалъул ТIанусиса Арайчу МухIамадова, Хунзахъ районалъул Хьиниса ГIабдусалам, Хунзахъ районалъул ТIанусиса Залму МухIамадова, Казбек районалдаса Расул, Хунзахъ районалъул ГIободаса ГIалиасхIаб Гьиматов, Унсоколо районалдаса Разият.
Цо-цоязул росабиги фамилиялги кIочон тун руго ТIалхIатида. Гьес гьарулеб буго гIайиб гьабугейилан.
РакIалдещвеял. Гьале гьанже цIидасанги гьезухъе тIад вуссунев вуго, ТIанусиса Сапинатил хIакъалъулъ хъвараб макъала бихьидал. Цо-кIиго рагIи Сапинатил хIакъалъулъги: лъималазул рокъоб лъимерлъи арай гьелъул гIамал букIана захIмалъабаз лъадарараб. ЦIализеги лъикIай йикIана гьей. МашаАллагьха, гьелъ умумузул бакъназда магIарул кучIдул ахIулел рукIараб куц. Дида гьанжегицин, гьелъул сураталъухъ валагьидал, рагIизе лъугьана доб хIайранаб гьаракь. Жинда тIад къараб ишалдехунги кIудияб жавабчилъи букIунаан гьелъул. Гьединал берцинал рагIабазе мустахIикъал руго сураталда ругел киналгоги. ГIажаибаб хинлъи букIана доб мехалда киназулго ракIазулъ. Гьеб хинлъиялъ нахъеги цIа бакана дир каранда…
КIудияб баркала кьезе бокьун буго газеталъул коллективалъе гьединал, гIун бачIунеб гIелалъе берцинлъиялъул ва бахIарчилъиялъул мисалаллъун ругел конкурсал тIоритIиялъухъги. Щиб лъалеб, гьаб сурат бихьидал, дихъе кIалъан рачIинеги бегьула, чIаго ратани, гьенир ругел дир курсцоял яги гьезул гIагарлъи, — я н а булеб буго ТIалхIатица.
ХадурагIи:
Гьалеха, хIурматиял цIалдолел, цоги сураталъул къиса. Цоги лъикIав инсанасда ракIалде щвана жиндирго гIумруялъул талихIаллъун рукIарал лахIзатал. 63 соналъ цебе бахъараб гьаб сураталъ каранда кунчIизарурал пикрабаз гьесие гьабураб рохалил асаралъ нижергоцин ракI бохизабуна. Гьадинал ракIалдещвеял нилъер киназулго рукIуна. Гьез цIидасанги рачуна нилъ гIолохъанлъиялъул рагьдухъе. Херал бахIарлъула, бахIаразул ракIал дагьалъги гогьлъула, гIолохъанлъула. Гьаб макъала хъвалелъул, дида цебеги кIанцIелеб букIана доб талихIаб заман
