Дир гьитIинаб, амма гIаданлъиялъул рахъалъ кIудияб Дагъистан. Жакъа духъги ялагьун, рохалилаб магIу гирулеб буго. Бахиллъун йиго дун дур къадруялдаги, къадру цIунизе кьураб къуваталдаги, гIаданлъи-гIадатлъиялдаги. Дур халкъалъ иргадулаб нухалда бихьизабуна нилъер къуват цолъиялъулъ букIин. КъобахъанагIан, гIумру лъанагIан, бичIчIулеб буго дица жиндир рагIаби макъалаялъул цIаралъе росарав Р. ХIамзатовасул рагIабазул магIна:
— Бокьула, бокьула, дир гьитIинаб халкъ,
Бокьула, бокьула, дир кIудияб халкъ!
Гьал къояз социалиял гьиназде яккидал, киса-кибего хъвалеб, гьикъулеб буго кумек хIажат бугищилан абун. Щивав дагъистанияв хIадур вуго цогидазе кумекалъе рачIине – ток бачинеги, насосалъ лъим минабахъа къватIибе кьабизеги, парталалдалъун, кванил нигIматаздалъун кумек гьабизеги. Ресалда ругел гIадамаз минабазе зарал ккаразе жанир чIезе бакIал кьолел руго. Лъим камун хутIаразе лъим баччулеб буго. Тарки поселокалъул гIадамазул хитIаб цIалидалги, рохелги магIуги жубана. Жидерго добаса лъимги баччун, шагьаралда машинаги чIезабун буго гьез. ЦIалана гьединго «Денеб» фирмаялъ,«ГIириб» концерналъ чIорого кьолел ругел лъел, соказул хIакъалъулъги. БакIарулеб буго гIарацги, къварилъи ккаразе кумекалъе.
Гьединго гьиназда батана Маргарита Симонялил хитIабги. Жиндирго рос Тигран Кеосаянил цIаралда бугеб ичIабилеб премия гьелъ бихьизабуна Дагъистаналдаса ГIабдурахIман ГIабдурахIмановасе, лъеца уней яс хвасар гьаюралъухъ. Дида лъала, къойилго гIадин бихьула дагъистаниязул сахаватлъи. Гьелъие мисалал гIемерал рачинеги бегьула. Хасго гьал ахирал соназ ккарал къварилъаби ккола гьеб сахаватлъиялъул нугIзаллъунги. Масала, тахшагьаралъул заправкабазда чан нухалда цIа кканиги, тIоцебесеб иргаялда, гIадамал гIедегIана би кьолеб станциялде. Минабазда цIа ккаразеги, унтаразеги ва цогидалги кумекалъе хIажатазухъе гIедегIула дагъистаниял. ГурхIел-рахIмуялъул чан гIуцIи батаниги, бакIарулеб буго гIарац. Гьаб гьитIинабго макъала хъвалаго, чангиязул лъикIал ишал рехсезеги санагIалъи кколеб гьечIо. Абула, квешлъиго гIадин, лъикIлъиги тIадбуссинин нилъехъейилан. Цо гьадинаб мисалги бачина. Палестинаялъул Гъаза шагьаралъе гIемераб кумек гьабуна, гьабулебги буго ва жеги гьабизеги батила дагъистанияз. Нилъеца дозие гьабураб кумекалъул гуро бицине бокьун бугеб. Бокьун буго жалго гIурабго къварилъи- захIмалъиялда ругониги, нилъееги кумек гьабизе ракIалде ккарал гьезул сахаватлъиги рехсезе. Гьеб кколарищ унго-унгояб иманалъулги чилъиялъулги кIудияб мисаллъун. Цере квералги ккун, ТIадегIанасде гьарделелги, жидерго гьечIеб ресалда рекъон, нилъее- дагъистаниязе гIарцулаб кумек гьабулел руго гьел.
— Ниж нужгун руго – гьадинаб буго дозул дугIаялъулги гьара-рахьиялъулги магIна. Гьеб лъабго хIикматаб рагIиялъ даим хвасар гьабизе буго дуниял ургъел гьечIолъиялдаса.
Шамай Хъазанбиева
