ДРялъул пенсиялъул фондалъул ЦIунтIа районалда бугеб отделалъул нухмалъулевлъун МухIамадов Варис хIалтIулев вугелдаса гIемераб заман гьечIо.Амма къокъабго заманалда жаниб гьесухъа бажарана мухIканго хIалтIи гIуцIизе гуребги, гьениб хIалтIухъабазе санагIатал шартIал чIезаризеги.
Варисил рахIатхвей буго пенсиялде ине заман щварал цо-цояз цереккунго документал хIадур гьарунгутIиялъ, хъвай-хъвагIаял цойиде ккезариялде гьез кIвар кьунгутIиялъ. «Щокъробе» заман щун хадуб лъугьуна захIматалъул книжкабазда, паспортазда, лъималазул метрикабазда ва цогидал къваригIунел документазда хиса-басиял гьаризе, ЗАГСалде, судазде ун, гьел цойиде ккезаризе. Гьелъ пенсия чIезабиялъул заманги гьоркьоб ун, букIуна ахIи-хIур. Гьеб рахъ роцIинабиялъул мурадалда отделалда буго «божилъиялъул» телефонги.
Варис вуго гIадамазул мурадал тIуразе хIаракат бахъулев чи. Гьединав вукIиналъ гьесдаса рази руго пенсионералги цадахъ хIалтIулелги.
