2019 соналда МахIачхъалаялъул ЗАГСалда гьабуна 3800-ялдаса цIикIкIун ригьин гьабиялъул хIакъалъулъ хъвай-хъвагIай. Гьезул гIемерисез хъизам гьабуна тIоцебесеб нухалда.
2020 соналъул январалдаги рехсараб ЗАГСалда къабул гьабуна ригьин гьабизехъин бугел гIолилазул 500 гIарза ва жеги 350 ригьнал хъвай-хъвагIайги гьабуна.
Щибаб моцIалда батIи-батIиял миллатазул вакилзабаз гIуцIула анцIила щугониги цIияб хъизам. Дагъистанияз ригьнал гьаруна СШАялъулги, ГIизраилалъулги, Германиялъулги ва Великобританиялъулги гражданазулгунги. Машгьурлъун руго Кувейталъулги, Иорданиялъулги, Турциялъулги, Сириялъулги гражданазулгун ригьналги. Аслияб къагIидаялда рехсарал улкабаздаса бихьиназе рачунел руго нилъер руччаби.
Ригьнал гьарулел руго 25-30 сон барал гIолилаз. Гъоркьисала 81 сон барав чияс ригьин гьабуна 77 сон барай гIаданалъулгун.
