Гьаб буго кинавго чи цо кивеялиго гIедегIараб, кинавго чиясе бачIинахъего ва абизегIанасеб къо бихьичIого, гIетI чвахичIого гIемераб гIарац къваригIараб заман. Гьединаб мехалда инсанасда вихьуларо живго гурони, гьесда цебечIоларо щибго, бихьуларо сверухъ лъугьа-бахъунеб, вачIунаро хIакъ-къоялде, бечелъизе, гьабулеб иш хехго гьабизе бокьиялъ кIочон тола гьаб ракьалда цогидалги рукIин, гьезулги адаб-хIурмат гьабизе кколеблъи, чияе зарал гьабизе бегьунгутIи. Аллагьас хъвараб букIининги абун, цIалаца юргъа-чу бухулеб гIадин, цула машинаялъул газалде хIетIе, вачIуна дандиясул нухде, бихьизабула хIама-багьадурлъи. Гьайгьай, Аллагьас хъвараб бихьичIого хутIуларо, амма нилъеегоги гIамал гьабизе кколеблъи бичIчIунгутIиялъ талихIкъарал ишазде рачунеблъиги кIочон тезе бегьуларо.
Россиялъул МВДялъул баяназда рекъон, нухазда хьвадиялъул, машинаби рачиналъул рахъалъ низам цIунуларезул цебесеб кьерда буго Дагъистанги. Гьениб тIоцебесеб бакIалда Москва, хадуб — Москва область батани, лъабабилеб бакIалда — нилъер республикаги. ГIажаиблъи, тIоцебесеб бакIалда гьечIолъи. Гьеле гьеб тIоцебесеб бакIалде ккезе бокьиялълъидал нухазда хьвадиялъул низамги цIунулареб, цIараб хIуччдасан рилълъинеги бокьулареб нилъее. Нилъ сундулго рахъалъ цере рукIине ккеларищха, гIадалаб чIухIиялъ гIакълуялда тIад бергьенлъи босулеб бугелъул.
ДРялъул МВДялъул пресс-хъулухъалъ щибаб анкьалъ тIиритIизарулел баянал цIалидал, битIахъе ботIрода рас бахъун чIезабулеб хIисаб лъугьуна. Анкьида жаниб республикаялда кканила 4-10 автоавария ва гьелъул хIасилалда къадаралде щванила 6-8 чи, гьездаго гьоркьоб чанго лъимерги, лъукъа-къотIун больницабазде щвезарунила 20-30 чи. Масала, ахираб анкьалда жанибги республикаялда ккун буго 22 ДТП, хун вуго ункъояв, больницаялде ккун вуго 25-яв.
19 сон барав гIолилас машинаги тункизабун чIвана 18 сон барав гIолилав. 40-йилъе вахарав шоферас, дандиясул нухде машина бачиналъул хIасилалда, данде бачIунелда речIчIизабуна гьеб ва къадаралде щвана кIигоял. Больницаялде ккаразул бицинего бицинарин. Цогидав гIоркьилас машина речIчIизабун буго токалъул хIоболъ. Пуланай гIаданалъ, тормозалъул бакIалда газалдаги цун, жиндирго «айгъир», гIадамал кваназе рачIунеб кафеялъул гордалги гъурун, гьенибе жанибе кIанцIизабун буго. Нухда хьвадиялъул низам цIунунгутIиялъ, нух бахунел рукIарал эбелгун ясалда пуланав гIоркьилас тункизабун буго машина. Гьадинал мисалал кигIан гIемер рехсаниги, талихIкъосарал ишал ккеялъе аслияб гIилла кколеб буго, нухда лъелго хьвадулелги машинаби рачунелги гIедегIи. Кире? Аллагьасда лъала. Амма гьезул цонигияв гIедегIун унев вукIун ватуларо кватIулеб бугеб как базе мажгиталде, къварилъиялде ккарасе кумек гьабизе, мискин-пакъирасе садакъа босун. ГIедегIун рукIун ратула хIама-багьадурлъи бихьизабизе, гIадалаб чIухIиялъ бараб чIолорхъжо къан чIезабизе кIунгутIиялъ, шайтIан къезабизе къуват гIунгутIиялъ, напсалъе бокьаралда тIад кверщел гьабизе кIолеб иманалъул загIиплъиялъ. ГIедегIун рукIун ратула хIалтIуде, чохьое хIажатаб балагьизе, шагьваталъул асирлъуде. Жеги рагIичIо, рагIилебищалиги лъаларо, авария ккеялъе гIилла букIанин мажгиталде, мадрасаялде, Къуръан цIализе, мутагIилзабазе дарс лъезе, мугIалимзабазухъ гIенеккизе гIедегIун вукIиналъ ккарабилан абулеб.
Умумузул аби буго, гIедегIараб гIор ралъдахъе щоларин, ай гIедегIун гьабурабгIан, мурадалде щоларин абураб. Бищун кватIани, бащдаб сагIаталъ кватIила щолеб бакIалде. Амма – чIаго-гIатIго, сах-саламатго. ГIисинал чIинхазулги кIудияб гохI лъугьунебин, гIисинккун тIинкIулебги лъим лъарахъеги щолебин, гIедегIуге, вацал, гIедегIуге!
МУХIАМАД-ХIАБИБ
