2024 соналъул 2 декабралда хасаб рагъулаб операциялде жиндиего бокьун ана ТIалхIатов Шамил. Гьев вукIана хъизамалда цохIо бугеб лъимер. Гьев цIалана ва гIуна МахIачхъала шагьаралда. 11 классги лъугIизабун, ана Хасавюрталъул техникияб училищеялде цIализе ва хадубго лъугIизабуна МахIачхъалаялъул автодорожнияб институт. ХIалтIулев вукIана автошколалда, инженерлъун.
Гьал къояз ниж дандчIвана Хьаргаби росулъа бахIарчияв васасул эбел ПатIимат МусахIажиевагун.
— ПатIимат, цо вугев вас кин виччазе кIварав СВОялде?
— Дица виччанищ гьев арав, вачIана контрактги хъван, жив рагъде унев вугинги абун. Дица бихъ-бихъун бана гьеб контракт. Амма гьев кинго чIечIеб мехалда дун ана рагъулаб комиссариаталъул полковникасул кабинеталъуе. Гьес бихьизабуна дида васас жидехъе чанго нухалда ахIараблъи, жив вачеян тIирун чIараблъи. Васгун барщун лъабго къоцин бана.
Виччаларин чIедал, гьес дида гьарана виччан тейин, жиндие бокьун бугин гьаб ракьалда лъалкI тезе ва, хвезе хъван батани, бахIарчиго хвезеги вугин абун. Шамилица кидаго абулаан Шамил имамасул заманалда гьавун вукIаравани живгиян абун. Гьедин ана ва, Ростовалде щведал, гьев командирлъунги тана.
Досул букIана онкология. Каспийск шагьаралда, 9 маялъул байрамалда, теракт гьабураб къоялъ, памятникалда цере тIугьдул лъезе школалдаса гьенире рачарал лъималазда гьоркьов вукIана гьевги. Гьениб кьвагьараб жоялъул кутакалъ, гIодов речIчIарав гьесул бетIер кьабун букIана. БотIрониб бидурихьги тIун, гьениб жаниб лъугьун букIана опухоль. Гьедин ккараб жо букIана мунагьал чурадил унтиги. Гьесда цадахъ рукIарал лъималазул 11-яв хвана. Досда лъалаан жинца гIемераб заман базе гьечIеблъи, щайгурелъул, щиб больницаялде аниги, операция гьабизе бегьуларин гурони абичIо.
СВОялде индал, гьужумалъ унезул цебесеб кьерде жив витIеян абулеб букIун буго гьес. Вахчизе гIадаб бакI балагьеян абидал, дуца дун хIалихьатавлъун гьавун вукIинчIогуриян кьолаан жаваб. Щиб гьабилеб, Аллагьасде аманат гьабун витIана.
— Мун васасухъе щунги йикIун йигоха, ПатIимат…
— Щвана. Гьев гьениве ун анцIабилеб къоялъ бачIана васас ахIун, ункъабилеб къо бугила жидер я лъим, я квен бихьичIогоян. Гьебго къоялъ къваригIанщинабги босун ана дун васас хъулухъ гьабулеб букIараб часталде. Дун гьениса ун анцIго къоялдасан ритIун руго гьел гьужумалъ. Гьениве унеб къоялъ видеобухьен гьабун цоцазда кIалъанги рукIана.
— Кинха дуда вас ватарав?
— Вас вугеб бакIалде ине бегьулеб хIал букIинчIо, речIчIулеб жоялъги дроназги тIадецуй гьабулеб букIиналъ. Гьенире ине бегьуларилан рагъухъаби чIедал, машина къачIалел васазда аскIоб букIараб автоматги босун, гьезде гьебги битIизабун, дица абуна, гьаб бакIалда нуж киналго чIвазе ругин цадахъ дун ячинчIониян. Цинги ячана гьение. Ватана вас. Дунго гIажаиблъана, ункъо моцIалъ цеве чIварав васасул жеги бакъвачIого батана би. Дир мурад букIана вас вукъизе кодове щвей…
Васасул жаназаги босун дун ана Курскиялде, гьенисан — Ростовалде, гьенирго рукIарал нилъерго магIарул гIолохъабаз кинабго гьабизе кколеб къагIидаялда чура-хулун, хIадур гьабуна жаназа, бана жаназадул как, ккун машинагун, гьевги вачун рачIана ватIаналде. Вас вукъана Шамхалалда.
— ПатIимат, васасул хъизан-лъимал рукIанищ?
— РукIана. Гьесул йиго цо яс, исана тIоцебесеб классалде цIализе ине йигей. Гьев хъизангун ватIалъун вукIана.
— ХIукуматалъул рахъалдасан кумек щолищ дуе?
— Щола. Дун ун йикIана С. Меликовасухъе, гьев цIалараб институталда мемориалияб къоно лъезе ихтияр кьеян гьаригун. Гьебги хIадурулеб буго. Дица васасул цIаралда мажгит базеги буго. Муфтияталъги кIудияб кумек гьабуна, гьеб базе ракь кьуна Ленинил Комсомолалъул цIаралда бугеб паркалда. Дие квербакъанщиназе кIудияб баркалаги буго.
Рукъият ГIалисултанова
