Эбелав хIакимасул хIунсулеб хитIаб

Машааллагь, исанасеб жиндирго ХитIабалда улкаялъул хирияв ва даимав бетIер Володя Путиница битIахъе цIам ххинабуна, бюджеталъул тIину гьечIеб ралъдалъ битIахъе ччугIби гIадин лъедолел рукIарал, рикIкIен гIемерал чиновниказда.

Байбихьана таманал соназ рухIалда барахщичIого жиндиргун рукь цIалев вукIарав улкаялъул премьер, Питералъул профессор Дмитрий Медведевасдаса.
Дунялалда бугебщинаб магIи-шатги щванила дуе, Дима, щибго камураб жоги хутIичIила гьаб гIумрудулъ, Россиялъул Президент вищулелъул кинабгIаги рокировкаги букIине гьечIила тIокIаб, гьанже парахат улкаялъул безопасность абураб жоги цIунун, ацида аскIов вукIайилан лъазабуна ВВПяс ДАМедида, ХIукуматги кодоса бахъун.
Киналго министералги чIезаруна, ИО-йилан цIакъ рокьукъаб цIарги кьун, цIерда хIамул гIадин.
Гьанже цойги цIияб хабарги щвана Кремлиялъул гьундузухъа — гьадав хIанчIил цIар бугев Генпрокурорги воржинавун вугила хъулухъалдаса. Амма квеш ккараб жо — Северо-Кавказский округалъул кIудиявлъун «воржун» вуго. Ай хутIаралги бюджеталда кIутIулел Кавказалъул «игитал» Лефортовалде ритIизе.
БагIаразул командир Колокольцевасул гIинда кида цIумур балебали лъалев чи пока улкаялда гьечIо.
Хъулухъалъулаб чодаса рещтIин-чIого церехун ине бегьулел министрзабазда гьоркьов бахьикъосарал экспертаз рикIкIунев вуго кIиго гигант, кIиго Сережа-дипломатияб хIаракатчилъиялъул акула Лавровги лебалав рагъулав комиссар Кужегудиновичги. Ай машгьурав Шойгу.
ТIупун лъураб накIкI рещтIун буго сахлъи цIуниялъул, культураялъул, экономикаялъул ва гь.ц. министрзабазул бутIрузда тIадги.
ПалхIасил, Путинил революционнияб ХитIабалдаса хадур «тIогьолаб» гIумруялдаса ратIалъизе бегьула ХIукуматалъул кормушкаялда рукIарал киналго чиновникал.
Я, бетIергьан Аллагь, Москваялъул репормаби республикаялдеги щвагиха.
Амин!