Миллиял проектал гIумруялде рахъинариялда бараб буго гIадамазул гIумру лъикIлъи
Дагьал церегIан къоязда, МахIачхъалаялда, «Журавли» гIелмиябгун сахлъи щула гьабиялъул комплексалда тIобитIана «Миллиял проектал гIумруялде рахъинариялъул мониторинг» абураб РФялъул халгьабиялъул гIуцIабазул нухмалъулезул данделъи. Гьенир гIахьаллъана РФялъул ХIисабалъулаб палатаялъул аудитор Дмитрий Зайцев, РФялъул ХIисабалъулаб палатаялъул аппараталъул нухмалъулесул заместитель Евгений Лисютин, ДРялъул Халкъияб Собраниялъул председатель Хизри ШихсагIидов, ДРялъул хIукуматалъул председатель Артем Здунов, ДРялъул бетIерасул ва хIукуматалъул администрациялъул нухмалъулев Владимир Иванов, ДРялъул ХIисабалъулаб палатаялъул председатель Билал ЖахIбаров, Россиялъул халгьабиялъулгун хIисабалъул 60 гIуцIиялъул нухмалъулел.
Данделъи рагьулаго Билал ЖахIбаровас бицана миллиял проектал гIумруялде рахъинариялда бараб бугин улкаялъулго гIадамазул гIумруялъул даража лъикIлъи. Республикаялъул ХIисабалъулаб палатаялъул нухмалъулес бицана, ДРялъул бетIер Владимир Васильевасул бихьизабиялда рекъон, 2019 соналда миллиял проектазул мониторинг гьабулеб бугин.
Республикаялъул парламенталъул спикер Хизри ШихсагIидовас абуна:
«Гьал проектал гIуцIана РФялъул президентасул байбихьиялда гъоркь ва гIадатиял гIадамазул гIумруялда рухьарал киналниги суалал тIуралел руго гьелда рекъон. Гьел проектал гIумруялде рахъинариялда ва гьезул хIасилазда бараб буго Россиялъул гIелмиябгун техникияб ва социалиябгун экономикияб цебетIей, нилъер букIинесеб, улкаялъул гIолеб гIелалъул гIумру. Гьелдалъун халгьабиялъулгун хIисабалъул гIуцIаби кколел руго пачалихъияб нухмалъиялъул аслиял бутIабазул цояллъун, гьезул хIалтIуда бараб букIине буго улкаялъул социалиябгун экономикияб цебетIей», — ан.
Дагъистаналда гьединал данделъаби тIоритIиялъ бицуна республикаялда лъикIал хиса-басиял кколел рукIин абун рикIкIунеб буго Артем Здуновасги.
«Регион инвесторазда ва федералиял властазул гIуцIабазда бичIчIулеблъун лъугьунеб буго. Жакъа нилъеда рихьулел руго экономика, туризм цебетIеялъул рахъалъ лъикIал хиса-басиял кколел рукIин. Регионалда дагь-дагьккун цебетIолеб буго ишалъулаб туризм. Масала, исана аэропорталда пассажиразул къадар 1,3 миллионалъ цIикIкIун буго. Республикаялда ахIвал-хIал хисулеб буго», — ян кIалъана премьер-министр.
Россиялъул ХIисабалъулаб палаталъул аудиторас баркала загьир гьабуна республикаялъул нухмалъиялъе ва миллиял проектазул халгьабулаго жакъа КСОялъ щиб гьабилебали бичIчIизе кколин абуна.
«Нижеца гIуцIараб методика щибаб субъекталда хIалтIизабизе бажарулеблъун лъугьинабизе ккола. Нилъеца халгьабизе ккола регионалиял миллиял проектазул мониторинг гьабиялъул рахъалъ ругел хIалбихьиязул хIакъалъулъ», — ан абуна Дмитрий Зайцевас.