КIиго дагъистаниялъе щвана ункъо сонил бищунго аслиял спортивиял къецазда гIахьаллъизе ихтияр
Улан-Удэялда боксалъул рахъалъ руччабазда гьоркьоб букIараб дунялалъул чемпионаталда 81 кг цIайиялда меседил медалалъе мустахIикълъана дагъистанияй Земфира МухIамадгIалиева. Финалалда гьелъ къезаюна Турциялдаса спортсменка Элиф Гюнери 5:0 хIисабгун. Гьелдалъун Земфира яхъана кIиго нухалъ дунялалъул чемпионкалъун.
Республикаялде тIадюссун ячIуней Земфира МухIамадгIалиевалда дандчIвай гьабизе тахшагьаралъул аэропорталде щвана ДРялъул хIукуматалъул вакилзаби, гьелъул гIага-божарал, гьудул-гьалмагълъи ва росу-жамагIат. ДандчIваялда кIалъазе вахъарав ДРялъул спорталъул министр МухIамад МухIамадовас абуна: «Земфирае щвараб бергьенлъи ккола нилъее цIакъ къиматаб. Гьелъие рес щвана 2020 соналда Токиоялда рукIине ругел Олимпиялъул хIаязда гIахьаллъизе. Гьение ине йиго нилъер ракьцояй СагIадат ТIалхIатоваги. Улан-Удэялда букIараб дунялалъул чемпионаталда гьелъие щвана мазгарул медаль. Баркула гьел кIияздаго бергьенлъаби ва гьарула хадубккунги икъбалгун талихI», — ан.
