Сочиялда тIобитIулеб буго «Вся Россия-2023» абураб тIолгороссиялъул журналистикаялъул форум. Гьеб халатбахъине буго 23 сентябралде щвезегIан. Форум рагьулаго, РФялъул Журналистазул союзалъул председатель Владимир Соловьевас президент Владимир Путинил рахъалдаса саламалъулаб каламги цIалана. 27-абилеб нухалда тIобитIулеб гьанжесеб журналистикаялъул форумалда гIахьаллъулел руго улкаялъулго прессаялъул вакилзаби.
Дагъистаналъул журналистазул делегациялда гъорлъ вуго «ХIакъикъаталъул» бетIерав редактор
Темирхан ХIасановги. Гьениб нилъер журналистазул нухмалъиялда гъоркь тIобитIана «Этномедиахолдинг «Дагъистан». Дагъистаналъул миллияб прессаялъул тарих ва цебетIей» абураб темаялда гургинаб столги.
Дагъистаналъул вакилзабаз гIуцIун букIана Расул ХIамзатов гьавуралдаса 100 сон тIубаялъул хIурматалда стендги. Расулил творчество бихьизабулеб стендалъухъ валагьизе вачIана РФялъул Журналистазул союзалъул председатель Владимир Соловьевги. «Дагъистан» Этномедиахолдингалъул» рахъалдаса Владимир Соловьевасе Расул ХIамзатовасул кечI
тIоцебе бахъараб «МагIарул большевик» газеталъул копия сайгъат гьабуна Темирхан ХIасановас ва Этномедиахолдингалъул нухмалъулев Арсен Юсуповас. Дагъистаналъул вакилзабаз бицана республикаялъул журналистазул хIалтIул хIалбихьиялъул хIакъалъулъ.
Темирхан ХIасановас машгьурав шагIирасул кечI магIарул мацIалда цIалана журналистазул форумалъул гIахьалчагIазе. Регионаздаса делегациязе цIакъ бокьана шагIирасул асар рахьдал мацIалда рагIизе. Расул ХIамзатовасул творчествоялда хурхараб стендалде аскIоре рачIарал цогидал регионазул вакилзабаз гъираялда цIалулел рукIана шагIирасул кучIдул. Цо-цояз гьенире рачIана Расул ХIамзатовасул шигIраби тIад рахъарал жидерго журналал, газетал ва тIахьал. Форумалъул выставкаялда лъун руго Дагъистаналъул халкъияб махщалил тIагIелалгун ювелирияб къайи. Форумалда тIоритIизе руго творческиял дандчIваял, бахIсал, бищунго
лъикIал журналистал кIодо гьаризе руго шапакъатаздалъун.