Тархазулал технологиязул министерство
Артём Здуновас хIалтIухъабазул лъай-хъвай гьабуна цIияв министрасулгун
Араб анкьалъул ахиралда ДРялъул бетIерасул ишал тIуралев Владимир Васильевас гъолбасана Сергей Снегирев министрлъун тIамиялъул хIакъалъулъ указалда гъоркь. Анлъабилеб августалда ДРялъул премьер-министр Артем Здунов вачIун вукIана Информатизациялъулги, бухьеналъулги массовиял коммуникациязулги министерствоялде. Гьес хIалтIухъабазул лъай-хъвай гьабуна цIияв министр – Сергей Снегиревасулгун.
Цевеккун министрлъун вукIарав Рашид Акавовасул хIалтIуе лъикIаб къимат кьуна премьерас. «Рашид Акавовасул кидаго букIана журналистикаялде лъикIаб бербалагьи. Гьес куцана гIемерал журналистал ва гьесие бокьун буго педагогикияб хIалтIуде машгъуллъизе. Гьесул рахъккола нижеца ва гьесие кумек гьабизе буго хадубккунги. Нижее хIажат буго профессоразул кумек, хасго стратегиял сессиял гIуцIулеб мехалда. Рашид Забитовичги вукIине вуго гьеб къокъаялда гъорлъ», – ан абуна гьес.
ЦIияв министрасда церечIарал масъалабазул хIакъалъулъ бицунаго, Здуновас кIварбуссинабуна республикаялдаги тархазул технологиял гIумруялде рахъинаризе ккеялде. «Хисулел руго вещаниялъул каналал, кибго хIалтIулеб буго тархазул телевидение. Нижеца гIуцIана IT-технологиялги, информациялъулал технологиялги, печатги, коммуникациялги, бухьенги берзукь кквезе бугеб министерство. Дир пикруялда, Сергей Владимировичасул гьеб рахъалъ гIураб хIалбихьи буго ва гьесухъа бажарила цебелъураб масъала тIубазабун», — ан абуна премьер-министрас.
