Жакъа Гьудуллъиялъул рокъоб республикаялъул г1умру цебет1езабиялъул бат1и-бат1иял бут1абазда лъик1ал х1асилал рихьизарурал дагъистаниязе шапакъатал кьуна Дагъистаналъул х1укуматалъул председатель Г1абдулмуслим Г1абдулмуслимовас.

 

 

Гьес, т1оцебесеб иргаялда, республикаялъул бет1ерасул ц1аралдасан данделъаразда баркана конституциялъул къо. Шапакъатазе мустах1икъазда гьоркьор рук1ана учительзабиги. Рак1 бохулеб ах1вал — х1алалда к1одо гьаруна Россиялъул ц1иял регионазда х1алт1изе арал учительзаби. Дагъистаналъул мустах1икъай учитель ц1ар щвана Гумбет районалъул Аргъвани росдал школалъул учитель Заира Пахрудиновалъеги.

 

— Г1агараб ват1аналъул парахалъи ц1униялъулъ дирги бут1а бук1иналдаса ц1акъ ч1ух1ула. Хасго ват1аналъул ц1ияб регионалда х1алт1изе щвей — гьебги дица рик1к1уна к1удияб жавабчилъи бугеб ишлъун. Дица х1аракат бахъана диде гьабураб божилъи рит1ухъ гьабизе. Гьединго к1удияб баркала загьир гьабизе бокьун буго республикаялъул нухмалъиялъе нижер х1алт1уе кьураб къиматалъухъиланги т1аде жубана гьелъ