2-10 октябралда Норвегиялъул Осло шагьаралда тIобитIизе буго гугариялъул рахъалъ дунялалъул чемпионат. Эркенаб гугариялъул рахъалъ гьелда гIахьаллъизе ругел спортсменазул цIарал загьир гьаруна бетIерав тренер Дзамболат Тадеевас. КIицIул Олимпиялъул, ункъо нухалъ дунялалъулгун Европаялъул чемпион ГIабдурашид Садулаевасул цевехъанлъиялда Норвегиялде ине руго: Абубакар Муталиев (57 кг), ГIабасхIажи МухIамадов (61 кг), Загьир Шахиев (65 кг), Евгений Жербаев (70 кг), Тимур Бижоев (74 кг), Радик Валиев (79 кг), Артур Найфонов (86 кг), МухIамад Къурбанов (92 кг), Зелимхан Хизриев (125 кг).
СияхIалда ругел цIаразде балагьидал, бихьулеб буго Дзамболат Тадеевасе дунялалъул чемпионаталда гIолохъанал, тIаса бищараб командаялда жидерго цIайиялъул категориязда кIиабилел номераллъун кколел спортсменазул хIалбихьизе бокьун букIин. Амма бичIчIулеб гьечIо Токиоялъул Олимпиялъул хIаязул мазгарул призер вукIаниги, Артур Найфоновасул бакIалда цогидал спортсменазе рес щай кьоларебали. Дагьал гьечIелъулха гьеб цIайиялдаги къуватал гугарухъаби.
