15 маялда, ДРялъул Верховный судалъул судьялъун хIалтIулев вукIарав Багъужа ГIонжолов ракIалде щвезавиялъул хIурматалда, Шамил районалъул МачIада росдадаса рикIкIад гьечIеб бакIалда бугеб лъималазул риидалилаб лагералда тIоритIана районалъул школазул 10- 11 классазул цIалдохъабазда гьоркьоб спортивиял къецал.
Къецазда гIахьаллъана 21 школалдаса цо-цо цIалдохъан. РукIана анлъго батIияб тайпаялъул спортивиял къецал: турникалда цIай, чIараб бакIалдаса кIанцIи, граната рехи, рекери, биатлон ва цогидабги.
Къецазде байбихьилалде цебе районалъул лъай кьеялъул управлениялъул начальник Ибрагьим ХIажиевас бицана РФялъул ва ДРя лъул мустахIикъав юрист, ДРялъул Верховный Судалъул судья, Реццалъул орденалъе ва РФялъул генералияв прокурорасул цIарулаб таманчаялъе мустахIикълъарав Б. ГIонжоловасул хIакъалъулъ. Салман Радуев гIадал террористазе суд гьабизе гьесда тIадкъан букIиналъ бицуна гьесул лъаялъулги, махщалилги, ритIухълъиялъулги хIакъалъулъ. Багъужа хIалтIана росулъ байбихьул классазул учительлъун, батIи-батIиял районазда прокуратураялъул следовательлъун, судьялъун. Кив хIалтIаниги, щиб хъулухъ тIадкъаниги, гьес гьеб тIубазабулаан ракIбацIцIадго. ЛъикIаб тарбияги кьун гIезавуна анлъго васги. ГIагараб ракьалде ва росу-жамагIаталде Багъужал букIараб рокьиялъул бицуна цо гьадинаб мисалалъ. «Дун хIухьбахъизе курортазде унаро. Куршавелалдасаги Сочиялдасаги хIухьбахъизе дие нусго нухалъ бокьула гIагараб МачIада росдал беричаб тIабигIаталда. Унго-унголъун дилъ талихIалъулаб асар загьирлъула ракьулъа гамачI бахъулаго, гьеб бекулаго, гьединго, рохьов хIалтIулаго», — ян.
ГIонжоловасул гIаданлъиялъул, ритIухълъиялъул ва бахIарчилъиялъул хIакъалъулъ бицана Дагъпотребсоюзалъул нухмалъулесул заместитель ХIажи ГъазимухIамадовас, Шамил районалъул федералияв судья МухIамад ХIайбулаевас, ДРялъул спорталъул мустахIикъав хIалтIухъан, РФялъул мустахIикъав тренер Ачало МухIамадовас ва цогидазги.
Багъужал кIудияв вас, судья МухIамадица баркала кьуна эмен ракIалде щвеялъе тIоритIулел къецал хIадураразе, киналго цIалдохъаби-спортсменазе, гьарана бергьенлъаби.
ПалхIасил, рекериялъулаб биатлоналъул къецазда тIоцебесеб бакI ккуна Ракьуб росдал школалъул цIалдохъан И. Абакаровас, кIиабилеб бакI – ХIебда школалъул цIалдохъан М. ХIадисовас, лъабабилеб бакI — ГьентIа школалъул цIалдохъан ХI. ХIусеновас.
Турникалда цIаялъул къецазда тIоцебесеб бакI ккуна ТIидиб росдал школалъул цIалдохъан М. МухIамаднуровас, кIиабилеб бакI Ругъелда росдал школалъул цIалдохъан М. ГIалихIмаевас, лъабабилеб бакI — КъахIиб школалъул цIалдохъан М. Расуловас.
Халалъухъе кIанцIиялъул къецазда тIоцебесеб бакI ккуна ГIасаб росдал школалъул цIалдохъан А. СалихIовас, кIиабилеб бакI — ХIебда росдал школалъул цIалдохъан М. ХIадисовас, лъабабилеб бакI – Гьоор росдал школалъул цIалдохъан Р. ХирамухIамадовас.
Къецазул хIакъалъулъ гьадин бицана районалъул ГТОялъул физкультураялъул программаялъул тестированиялъул централъул нухмалъулев, тадбиралъул гIуцIарухъан Тикило МухIамадовас:
«ХIебда росулъ дица гIуцIун букIана спортивияб кьвагьдеялъул тир. Районалъул росабалъа ахIун, дица кьвагьдезе ругьун гьавуна 440 гIолилав. Щай дуца гIолилазда кьвагьдезе малъулеб бугебин абун, полициялъулазул рахъалдасан дие бадибчIвайги щвана. Дица гьезда бичIчIизабуна Россиялде, Дагъистаналде тушман кIанцIани, кьвагьдезе лъалел гIолохъаби жидерго хъизамазухъе тIад руссунеблъи, лъаларезул цIарал заназда хъвазе кколеблъи. Жакъасел къецазда гIолилаз рихьизарурал хIасилаздасаги дун цIакъ вохана», — ян.
Нури НУРИЕВ
