Араб анкьалъул ахиралда республикаялъул нухмалъулесул ишал тIуралев Сергей Меликовас хиса-басиял гьаруна хIукуматалда.
Спорталъул ва физическияб культураялъул министрлъун тIамуна ДРялъул эркенаб гугариялъул рахъалъ федерациялъул нухмалъулевлъун вукIарав Сажид Сажидов.
С. Сажидов ккола дунялалъул ва Европаялъул кIицIул чемпион. 2004 соналда Афиналда тIоритIарал Олимпиялъул хIаязда гьесие щвана мазгарул медаль. 2020 соналъул октябрь моцIалде щвезегIан вукIана республикаялъул тIаса бищараб командаялъул кIудияв тренерлъун.
ДРялъул хIукуматалъул вице-премьер Муслим Телякавовасул гIахьаллъигун тIобитIараб данделъиялда Спорталъул министерствоялъул хIалтIухъабазулгун лъай-хъвай гьабуна цIияв министрасулгун. ГIемерал соназ гьабураб ракIбацIцIадаб хIалтIухъ, гьанжелъизегIан министрлъун вукIарав МухIамад (МахIач) МухIамадовасе баркалаги кьун, М. Телякавовас абуна гьесул бажариялдалъун ахирал соназда республикаялда спорталъул гIезегIан лъикIал ишал кканин. РакIалде щвезаруна, эркенаб гугариялъул ва боксалъул рахъалъ, щибаб соналъ нилъер спортсменаз росарал бергьенлъаби. Рехсана цогидалги тIокIлъаби.
Нижехъе щварал цо-цо баяназда рекъон, гьев Гъизилюрт районалъул нухмалъулевлъун тIамулев вуго. Гьелъул хIакъалъулъ бакка-бахъи гьабуна М. МухIамадовасги ва абуна нагагь гьаниб «гьава-бакъ рекъечIев» чи ккани Гъизилюрталде ваккейин, гьениб киназего гIураб хIалтIи букIине бугин.
Лъай кьеялъул министрлъун тасдикъ гьавуна республикаялъул росдал магIишаталъул университеталъул ректорлъун вукIарав ЯхIя Бучаев.
Лъай кьеялъул министрлъун тIамурав ЯхIя Бучаевги бажари бугев, хIалтIи бачине лъалев чи вукIин киназдаго лъала. Гьев ректорлъун вугебгIан мехалда росдал магIишаталъул университеталда цониги ришват босараб хIужа ккечIин гIемер бицуна.
Республикаялъул ралел бакIазул министрлъун тана Артур Сулейманов.
Ралел бакIазул министрасул хъулухъалде тIамурав Артур Сулеймановас лъугIизабуна Нижний Новгород шагьаралъул ралел бакIазул университет. Дагьаб заманалъ гьенивго хIалтIунги вуго. Амма гьесул бажари-гьунар бихьанин абизе бегьула «Ростех» абураб пачалихъалъулаб корпорациялда хIалтIулеб заманалда.
— Дагъистаналда хIалтIарав чи гьечIониги, дида лъала дирго ракьалъул гIадаталги, умумузул тарихги, рахьдал мацIги. Республикаялда ругел гIунгутIабиги гIезегIан лъикI лъала. Цере лъурал масъалаби руго кутакалда кIвар бугел ва хьул буго цадахъ лъугьун гьел тIуразаризе кIвелин абураб, — ан абуна А. Сулеймановас министерствоялъул хIалтIухъабазулгун лъай-хъвай гьабулеб мехалда.
