Болъихъ росулъ тIобитIана Футбол бокьулезул лигаялъул кIудияб турнир. Гьелда гIахьаллъана районалъул росабалъа 16 команда.
Исана турнир гIуцIун букIана гIемерал соназ Чанхъо росдал гьоркьохъеб школалъул директорлъун хIалтIарав СагIитбег Алхасов ракIалде щвезавиялъул хIурматалда. Жигарал гIуцIарухъабилъун рукIана МухIамад ГIалиевги, МухIамад Митаровги, Шамил Ражабовги. ГIарцул рахъалъ квербакъана районалъул администрациялъги спонсоразги.
ТIоцебесеб бакIалъе мустахIикълъана «Техникс» абураб команда (гьезие приз хIисабалда кьуна 75 азарго гъурущ). КIиабилеб бакIалде ккана «ГIанди» абураб команда (гьезие кьуна 50 азарго гъурущ) ва лъабабилеб бакIалде – «Аякс» абураб команда (25 азарго гъурущ).
