Улкаялда исана ичIабилеб нухалда тIобитIулеб буго «ЧIагояб классика» абураб пасихIго кечI рикIкIиналъул къец.Бищунго жигараб гIахьаллъи гьабурал регионазул сияхIалда буго Дагъистанги. Ахирал соназда рехсараб къецалъул финал тIобитIула Москваялъул БагIараб майданалда. Марталъул ахиралда гьабизе буго къецалъул хIасилги.
Жюриялда цадахъго, къецалъул хIасил гьабиялъулъ гIахьаллъизе руго Москваялъул Борис Щукинил цIаралда бугеб Театралияб институталъул педагогалги. Экспертаз бищунго пагьмуялин цIар чIварал финалистал росизе руго рехсараб институталде цIализе.
Проекталъул сайталда гIуцIараб онлайн-гьаракь кьеялъул хIасилалда церехъабилъун рикIкIана 30 регион. Гьезда гьоркьоб буго нилъер республикаги. «Гьел регионазда гIуцIизе руго 11-абилел классазул цIалдохъабаз кучIдул рикIкIиналъухъ гIенеккиял. Экспертаз тIадегIанаб къимат кьурал цIалдохъабазе рес щвезе буго Б. Щукинил цIаралда бугеб Театралияб институталда цIализе хIалбихьиялъул къецалда гIахьаллъизе – гьел рачIинахъего росула кIиабилеб туралде», — ян баян гьабуна ДРялъул Лъай кьеялъул ва гIелмуялъул министерствоялъул хIалтIухъан Лейла Арсланбеговалъ.
