Социалиял гьиназда, гьединго гIадамал данделъарал бакIазда, бицунеб буго коронавирус унти Дагъистаналде щун букIин тIалъиялъ халкъалдаса бахчулеб бугин абун.Гьелъул хIакъикъат цIехон нижер мухбир Нури Нуриевас гара-чIвари гьабуна ДРялъул Роспотребнадзоралъул хIинкъи цIикIкIарал рахунел унтабазда хадуб халкквеялъул отделалъул начальник Мурад Рамазановасулгун.
— Коронавирусалъ Дагъистаналда гIадамал унтизе рес гьечIин абиларо, амма гьеб ккола щакаб жо. Рес буго даран-базаралъ Китаялде унел дагъистанияз гьеб унти республикаялде босун бачIине. ТалихIалъ, коронавирусалъ унтиялдалъун гIадамал холел ругеб китаязул Ухан шагьаралда жакъа цониги дагъистанияв гьечIо. Аслияб къагIидаялда нилъерал руго Китаялъул цогидал провинциязда, — ян бицана М. Рамазановас.
— Коронавирусалдаса цIуниялъе Дагъистаналъул гIорхъабазда постал лъун ругищ?
— РФялъул Роспотребнадзоралъул управлениялъул буюрухъалда рекъон, пачалихъалъул гIорхъабазда ругел жанире-къватIире гIадамал риччаялъулал киналго пунктазда руго санитариялгун карантиналъул хъаравулзаби, гьенирго руго изоляторалги. Гьениб къватIисел улкабаздаса рачIунел чагIазул чорхол цIа-каналъухъ халгьабула (термоконтроль). Поезд-самолеталдаса къватIире рахъиналде ва аэропорталдегун вокзалалде жанире рачIунезухъ тепловизоралъ хал гьабула. Черхалъул цIа-кан цIикIкIин, хъегIи-чинхъи яги магIу чвахи тIатани, цогидаздаса батIагьавун, унтарав изоляторалда лъола ва гьениса медицинаялъулаб хехаб кумекалъул машинаялда гьев рахунел унтабазул больницаялде витIула. Хадуб халгьабула унтарасулгун бухьен букIарал чагIазулги.
— Цо-цо чагIаз гьабулеб буго дарабазул ва гьурмада ралел маскабазул нахърател мукъсанлъун бугин…
— Гьединаб нахърател гьабиялъе кинабгIаги хIажалъи гьечIо. Унти байбихьани, дарабазулги маскабазулги къварилъи букIине гьечIо. Исана нилъер республикаялда, цIакъ дагьал чагIи гурони, гIадатияб гриппалъцин унтичIо. Гьурмада маска ххезе ккараб хIалги гьаниб гьечIо.
Коронавирусалдаса цIуниялъеги хIалтIизарула гIадатияб гриппалъего гIадал тадбирал: рокъоб бацIцIадаб гьава букIинаби, гIадамал ракIарараб бакIазде инчIого чIей, вирусаздаса гьава бацIцIад гьабиялъулал тадбирал, сапнаца кверал чури, гьайгьай, умумузулго букIараб дару – ражи хIалтIизаби.
— Щиб гIакълу кьелеб дагъистаниязе, цIодорлъи гьабиялъул мурадалда?
— КъватIисеб улкаялде сапар бухьиналда цебе, чара гьечIго коронавирусалдаса цIуниялъе прививка гьабизе ккола. ЛъикIаб букIина, коронавирусалъ гIадамал унтун ругеб улкаялде, хасго Китаялъул Ухан гIадал шагьаразде, сапар гьабич1ого тани.
— ГIадатияб гриппалда дандеккун, инсанасул гIумруялъе кигIан цIикIкIараб хIинкъи букIунеб коронавирусалъул?
— Аслияб къагIидаялда коронавирусалъ унтула 60 сонил ригьалдаса тIаде арал, хасго иммунитет дагьлъарал, чакрил унти ва бидул тIадецуй цIикIкIарал чагIи. Коронавирусалде дандеккун, гIадатияб гриппалъулги къватIул унтабазулги инсанасул сахлъиялъе ва гIумруялъе гIемерго цIикIкIараб хIинкъи букIуна. Коронавирусалда данде ккун, гIадатияб гриппалъ унтарал кIиго нухалъ цIикIкIун хола. Цо пуланаб мурадалъе гIоло, СМИялъ дунялалдаго ахIи бахъинабун, гIадамал хIинкъизарулел руго. Гьеб рахъалъ лъугьун бугеб ахIвал-хIал ккола лъел стаканалъуб буран бахъинаби гIадаб гIала-гъважа.
