29 январалда Монополиялда данде чIараб федералияб хъулухъалъул (УФАС) республикаялда бугеб Управлениялъул нухмалъулев Каир Бабаевас журналистал ракIарун рукIана 2019 соналда жаниб гьабураб хIалтIул бицине.
Араб соналъ гьез къабул гьабун буго кинабниги 1700-гIанасеб гIарза. Гьеб рахъалъ, Россиялъул регионазда дандеккун, Дагъистаналъул УФАС цебесеб бакIалда буго. Гьединго контракталъул системаялъул къанун хвезабуралъухъ 5291000 гъурщиде гIакIаги къотIун буго УФАСалъ.
Гьелда гьоркьоса 3000000 гъурущ кьун буго пачалихъиял идарабаз.
ГIамм гьабун босани, араб соналда жал батIаго квеш хIалтIичIин абуна Каир Бабаевас. Амма гьабичIого хутIараб хIалтIиги дагьаб гьечIин.
Хадуб журналистаз байбихьана суалал кьезе.
Масала, гьикъана МахIачхъалаялда маршруткабаз рекIадухъ босулеб багьаялъул хIакъалъулъ. Араб соналда гьелда сверухъ гIемераб гIалагъважа букIана. Цо-цо маршруткабазул шофераз байбихьана 23 гъурущ босизе.
Цогидаз лъазабуна жидеца багьа бахинабизе гьечIин, 17 гъурущго толеб бугилан.
Гьеб мехалда республикаялъул УФАСалъ гьезда лъазабун букIана нужер ихтияр гьечIин анлъго гъурщица багьа бахинабизе. Амма Москваялъ къабул гьабичIо гьелъул гьеб хIукму. Гьедин 2019 соналъул ахиралде киналго маршруткачагIаз 23 гъурущ абун чIезабуна рекIадухъ багьа.
Щай гьедин ккараб ва кIолеб бугищ багьабазда сверухъ лъугьун бугеб ахIвал-хIал хисизабизеян гьикъана пресс-конференциялда.
Иш гьединан ккеялъул гIайиб жидедаго бугеб гIадаб асар хутIанин жиделъилан абуна Каир Бабаевас. Амма жидер гIайибги кинабилаха гьениб букIинеб? Миллионалдасаги цIикIкIун чи вугеб шагьаралда жакъа транспорталъул компанияз хIалтIизабулеб бугеб система дандекколарила.
Бабаевасул рагIабазда рекъон, цоги шагьаразда кирниги дандчIваларо МахIачхъалаялда гIадал пассажиразе санагIалъи гьечIел «Газелал». Гьединлъидал гьеб рахъалъ хиса-баси гьабизе кколила, тIоцебесеб иргаялда.
КIиабилеб бугони, УФАСалъ хIукму гьабулаго хIисабалде росичIел техникиял ва цогидал гIиллабиги ратун руго гьенир. Гьебги хIисабалде босун, нахъчIван бугоан Москваялъ гьезул хIукму.
Амма жал кверал тIатIала лъун чIун гьечIин, пассажирал раччиялда хадуб автоматизированнияб система хIалтIизе биччазе ракIалда бугин бицана Каир Бабаевас. Гьеб хIалтIизе лъугьун хадуб бигьалъила гьел багьабазда сверухъ бугеб гIалагъважа роцIинабизеги.
Гьединго журналистаз гьикъана УФАСалъ хIалтIизабизе байбихьараб «Дисквалификация» абураб статьяялъ кинал хIасилал кьурабиланги.
— КIиго хIаким хIалтIудаса вахъана нижеца гьеб статьяялда рекъон, — илан бицана Каир Бабаевас. — Гьезул цIарал гьанир рехсечIого тела. Гьеб гьанжего-гьанже хIалтIизабулеб буго нижеца. Гьелъ лъикIаб хIасил кьезеги байбихьана.
