Россиялъул Генералияв прокурорлъун вукIарав Юрий Чайка Северияб Кавказалъул Федералияб округалда РФялъул президентасул вакиллъун тIамуна.
Гьесде щвезегIан гьенив вукIарав Александр Матовников тIамуна лъелал аскаразул бетIерав нухмалъулесул заместительлъун.
Юрий Чайкал цIияб хъулухъалъул «ХIакъикъаталъе» бицунаго, политолог Ханжан Къурбановас рехсана РФялъул цIияб хIукуматалда гъорлъ Северияб Кавказалъул ишазул министерство гIуцIун гьечIолъи.
Хадубги гьес абуна: «Дир пикруялда, хадубккун букIинарин ккола Кавказалда президентасул официалияв вакил толеб къагIидаги. Кавказалъ жиндирго жамгIиябгун политикияб гIумруялъул цIияб тIамач рагьилин ккола кватIичIого.
Хас гьабун Дагъистаналъе Чайкал хъулухъалъ кьезесеб пайдаялда гъорлъ дида бихьула ришватчилъиялда данде гьабулеб къеркьеялъул тадбирал. Ай, жеги чанги хIаким вачун ине рес буго нилъер гьаниса».
МустахIикъаб хIалхьиялъул бакIалда Чайкае бигьаяб хъулухъ кьунин Путиница СКФОялдеги витIунин абулел эксперталги руго.
Юрий Чайкада цеве вукIарав Александр Матовников гьанжелъагIан гьеб хъулухъалда рукIарал Путинил вакилзабазда гьоркьов бищунго мисалияв вукIаниланги тIаде жубалеб буго гьез.
Бокьараб суалгун тIаде ани, адабалда тIадеги къабул гьавун, чиясухъ гIенеккизе гьунар букIанила гьесул.
Живго Чайка цIияб хъулухъалдаса цIакъ разиго вуго. Путинилгун букIараб дандчIваялда гьес абуна жиндир кIудаэменги вукIун вугин гьенив хъулухъ гьабулев, гьанже жиндаги Кавказалъул цIияв сардарилан абизе бегьулилан.
