РФялъул хIукуматалъ премия кьуна Алик ГIабдулхIамидовасе.
Россиялъул прессаялъул къолъун кколеб 13 январалда, РФялъул хIукуматалъул нухмалъулев Дмитрий Медведевас батIи-батIиял шапакъатал ва премиял кьуна журналистазе.
Жиндирго хIалтIулъ бихьизабураб бихьинчилъиялъухъ премия кьуна машгьурав журналист Алик ГIабдулхIамидовасеги. Нилъер республикаялдаса, улкаялъул хIукуматалъул рахъалдасан гьединаб шапакъат щварав чиги гьев гурони ккечIо.
— Нанотехнологияз ругьунаб, хъвадарулеб къагIида нахъе цуниги, дун божарав вуго журналистикаялъул жиндирго аслу хисичIин ва хисизеги гьечIилан абураб пикруялда. Дида лъала, бакIалъулал хIакимзабазе кидаго гуро бокьулеб журналистас кьурал суалазе жавабал кьезе. Амма федералияб централъе нижеца бакIарулеб информациялъул кIвар буго. ЦIодорал чагIи тIалъиялда ругони, гьез СМИялъул вакилзаби тIаса квер босун тезе гьечIо, гьелда дун божаравги вуго, — ян абуна А. ГIабдулхIамидовас, Д. Медведевасе шапакъаталъухъ баркалаги кьолаго.
«ХIакъикъат» газеталъги баркула ишцоясда гьесие щвараб шапакъат. Хадур гIемерлъаги, баракат лъеги.
