Машгьураб мазь ва батIи-батIиял унтаби сахгьариялъе цIиял къагIидаби ургъарав хирург Александр Вишневский кколаан нилъер ракьцояв

Александр Вишневский гьаву­рал­даса 145 сон тIубай кIодоги гьа­бун ва Москваялда бугеб, ай гье­сул цIар кьураб хирургиялъул цIех-рехалъулаб централъ 75 сон бай­ги хIисабалде босун, гьал къояз­да МахIачхъалаялда тIобитIана гIелмияб конференция.
Гьелда гIахьаллъи гьабуна РФя­лъу­л президентасул СКФОялда вугев вакиласул заместитель Игорь Рабковас, НМИЦалъул директор Амиран Ревишвилица ва Вишневскиясул тухумалдаса хирург Галина Вишневскаялъ.
Конференция тIобитIизе хIа­ра­­­кат бахъана А. В. Вишнев­ския­­сул цIа­­ралда бугеб инсти­туталъул хIал­тIухъан, медицинаялъул гIел­ма­базул доктор, травматологиялъул ва ортопедиялъул отделениялъул за­­ве­дующий АхIмадов Багьавудини­ца, гьединго рехсараб института­лъул пластикияб хирургиялъул отде­ле­ниялъул заведующая Наида Сул­тIа­новалъ.
Конференция рагьана республикаялъул клиникияб больницаялъул азбаралда А. В. Вишневскиясе бараб памятникалда цере тIугьдул лъеялдасан. Гьеб тадбиралда гIахьаллъи гьабуна ДРялъул хIукуматалъул председателасул тIоцевесев заместитель Анатолий Карибовас, Дагъистаналъул сахлъи цIуниялъул министр Жамалудин ХIажиибрагьимовас, Мос­кваялдаса ва цогидал регионаздаса рачIарал гьалбаз. Гьенив кIалъазе вахъарав ДГМУялъул ректор Сулейман Маммаевас киназего баркалаги кьуна, заманги батун, Дагъистаналде рачIаралъухъ.
Гьенисан киналго ана ДГМУялъул гIелмиябгун лъайкьеялъул инновациялъулаб централде. Гьениве вачIун вукIана ДРялъул бетIер Владимир Васильевги. Гьес бицана тохтурзабазулги гьезул захIматаб хIалтIулги хIакъалъулъ.
— Кин бугониги, дагъистаниял ру­го цебелъураб масъала тIубалел ва жидерго хIалтIи ракIбацIцIадго гьа­булел гIадамал. Гьеб нилъеда бихьизеги бихьула. Цогидал бутIабазда хIал­тIулел дагъистаниязеги хасиятаб буго бергьенлъаби росизе гъира букIин, — абун бицана Дагъистаналъул бетIерас.
ДРялъул сахлъи цIуниялъул ми­нистр Жамалудин ХIажиибрагьи­мо­вас бицана Александр Вишневскиясул гIумруялъулги гьес ракьалда тараб лъалкIалъулги хIакъалъулъ.
А. Вишневскиясул лъикIлъи да­гъистанияздаги кIочон гьечIо. Гьесул цIаралда музей хIалтIулеб буго тохтурас гIумру гьабулеб букIараб Чирюрталда. Конференциялде рачIарал гьалбал щвана гьениреги ва бихьана гьес гIумру гьабулеб букIараб минаги, хIалтIизарулел рукIарал алаталги.
ПатIимат Расулова