Церекъад журналистазул букIана кутакалда ракI бохараб къо. Информациялъул ва печаталъул агентствоялде ва Цифрабазулаб цебетIеялъул министерствоялде гьоболлъухъ рачIун рукIана ДРялъул хIукуматалъул бетIер ГIабдулмуслим ГIабдулмуслимов ва председателасул заместителал Ризван ГъазимухIамадовгун Заур Эминов.
Араб гIасруялъул 80-абилел соназда Министрзабазул советалъул председательлъун вукIарав ГI. Мирзабеков ва араб соналда республикаялъул хIукуматалъул бетIерлъун вукIарав ГI. ГIамирханов гурони 40-ялдаса цIикIкIарал соназ гьеб комплексалде республикаялъул нухмалъулел рачIун рукIинчIин абуни мекъи ккеларо. Цифрабазулаб цебетIеялъул министерствоялъул цIияв нухмалъулев коллективалъе вихьизавураб тадбиралдаса хадуб, хIукуматалъул нухмалъулел дандчIвана республикаялъул газетазул редакциязул хIалтIухъабигун.
Гьеб букIана цебегоялдаса нахъе журналистазе хIажатаб тадбирги. Гьединлъидал данделъиялда рорхана жакъа Дагъистаналъул жамгIияталда ругел захIмалъабазул, информациялъулаб политика гIумруялде бахъинабиялъулъ ругел квалквалазул ва церечIарал масъалабазул хIакъалъулъ суалал.
ГIабдулмуслимовас журналистазулгун данделъи байбихьана жакъа Россиялда ва Дагъистаналда бугеб ахIвал-хIалалъул хIакъалъулъ биценалдалъун. Гьелда хурхун тIадчIей гьабуна ВатIан бокьи ва гьеб цIуни щивав дагъистаниясул бидулъ бессун букIунеб даражаялда бичIчIикьеялъул хIалтIи гIуцIиялда. Гьес бичIчIизабуна, Россиялъул президент В. Путинил амруялда рекъон, Украинаялда нилъер халкъалъе гьа- булеб гIакъуба къотIизаби мурадалда тIобитIулеб хасаб рагъулаб тад- биралдаса цо-цо нилъер ватIанцояз бихьизабулеб бугеб разигьечIолъи, гьеб дагъистаниязда рекъараб иш гурилан. Пикру буссинабуна гьединаб бичIчIи гьечIолъиялде данде рагъ базе ккеялде.
ХIукуматалъул бетIерас баркала загьир гьабуна «Дагъистан» РИАялъул нухмалъулев МухIамад МухIамадовасе, Россиялъул президент В. Путинилгун букIараб пресс-конференциялда гьес республикаялъул энергетикаялъул, газалъул ва цIатариялъул рахъалъ ругел гIунгутIабазул хIакъалъулъ кьураб суалалъухъ. Щайгурелъул, гьелъул хIасилалда Россиялъул батIи-батIиял идарабазе кьураб 14 буюрухъазул ункъояб букIана рехсарал гIунгутIаби тIагIинари мурадалда Дагъистаналъе гIарцулаб ва цогидаб кумек гьабизе ккеялда хурхараб. Гьелдалъун ГIабдулмуслимица бихьизабуна кколеб бакIалда абураб журналистазул рагIул даража ва къимат букIин.
«ДИЦА ХIАЛТIУЛ КЪО БАЙБИХЬУЛА «ХIАКЪИКЪАТАЛДАСАН»
Гьедин абуна хIукуматалъул бетIерас ва бичIчIизабуна газетаздехун ГIахьвахъ районалъул магIишаталда зоотехниклъун хIалтIулеб заманалдасаго рокьи букIин.
Жакъа дагъистаниязе ва гьелъул нухмалъулезе кIвар бугел масъалабазул цояблъун ГI. ГIабдулмуслимовас бихьизабуна миллиял газетазул бугеб ахIвал-хIал.
— ГIолеб гIелалъул кIудияб гIунгутIилъун кколеб буго рахьдал мацI лъазабиялде хашаб бербалагьи букIин ва эбел-инсудаса байбихьун, школаги гъорлъе бачун, гьеб хIал хисизабизе заман щун буго. Гьеб ахIвал-хIал хисизабиялъулъ цебе хъанлъи бихьизабизе хIажат буго миллиял газетаз, — ан абуна гьес.
Дида ракIалде щвана 1970-абилел соназда Казбек райкомпартиялъул секретарьлъун ва хадуб рай- исполкомалъул председательлъун вукIарав ГIабдулмуслимил эмен, МухIудин, райкомалъул пленумазда, батIи-батIиял данделъабазда гIурус мацIалда хIадурараб доклад магIарул мацIалда цIалулаан кидаго. Гьединаб букIана хъизамалдаги хIалтIудаги рахьдал мацIалдехун рокьи гьесул инсулги.
Цадахъ заместителалгун 12 тIала бугеб борхатаб минаялъув, лифталдаги инчIого, вилълъанхъун щвана щибаб тIалаязда ругел редакциязде, лъай-хъвай гьабуна журналистазулгун, хал гьабуна гьезие хIалтIуда чIезарун ругел шартIазухъ.
«ХIакъикъаталъул» редакциялда хIукуматалъул бетIерасе бокьана жанахIалъул къадазда ран ругел магIарул миллаталъул гIумруялда жаниб бихьулеб лъалкI тарал мустахIикъал вакилзабазул сура- тал рати. РакIалде щвезаруна мунагьал чураяв МухIамадтIагьир ГIабдулбасировасулгун гIолохъанав зоотехникасул рукIарал дандчIваял ва гьес Дагъистаналъул росдал магIишат цебетIезабиялъе гIоло гьабураб хIаракатчилъиялъул, гьесул гIуцIарухъанлъиялъул бергьараб гьунаралъул мисалал.
ЖУРНАЛИСТАЗУЛ РУКIА-РАХЪИНАЛДЕ ЦIИКIКIУН КIВАР
ДандчIваялда кIалъазе рахъарал «Дагправда» газеталъул бетIерай редактор Б. Токболатовалъ, «Дагестан» РИАялъул нухмалъулев М. МухIамадовас, «Лезги газеталъул» бетIерав редактор М. Ибрагьимовас, «Дагъистаналъул чIужугIадан» журналалъул нухмалъулей Н. Керимовалъ рорхана журналистазул харжазул, мина къачIаялъул, республикаялъул идарабазе нухмалъулел хIакимзабазул газетазда рахъарал макъалабаздехун бугеб тIаса-масагояб бербалагьиялъул, министерствабазул пресс-хъулухъазул хашаб хIалтIиялда, журналистазул ихтиярал цIуниялда хурхарал суалал. Аслиязул цояблъун ккана редакциязул хIалтIухъабазе щолеб харж цIакъго дагьаб букIиналъул суалги. Гьоркьохъеб хIисабалда босани, гьеб кколеб буго 17 азарго гъурущ. Гьебин абуни, жакъасел багьабиги хIисабалде росун, гIумруялъул даража цIунизе хIажалъулелдаса дагьаб бугилан бицана хIалтIухъабаз.
Гьениб кIудияб пикру буссинабуна республикаялда министерствабазул нухмалъулез гIадамал тIаде къабул гьариялъул бугеб лъикIаб гуреб ахIвал-хIалалдеги. ГIабдулмуслим МухIудиновичас рагIи кьуна церелъурал суалал гIумруялде рахъинаризе ва республикаялъул экономикиябгун социалияб рахъ цебетIезабиялъе гIоло гьабулеб хIалтIулъ журналистазулгун щулияб бухьен букIинабизе.
З. Ильясов
