МахIачхъалаялъул каналалъуре рортарал эбелги гьелъул лъабго лъимерги хвасар гьарурал полициялъул хIалтIухъаби кIодо гьаризе руго.
Гьеб иш ккана гьал къоязда. ЧIужугIаданалъ бачунеб букIараб машина бортана КОРалъубе. Гьеб бихьарал, нухазда низам цIунулеб хъулухъалъул хIалтIухъаби ГIабдула МухIамадовги Рустам МухIамадовги кумекалъе рортана. Гьезго хехаб кумекалъул машинаги ахIана. Хадур гьел щвана жидецаго хвасар гьаюрай гIаданалъухъе рокъореги. Гьелъги гьелъул инсуцаги гьара-рахьиги гьабун, разиго къабул гьаруна гIолохъаби.
Гьединабго бахIарчияб иш гьабуна нилъер ракьцояз гьал къоязда Калининград областалъул Балтийск шагьаралдаги.
26 октябралда, газги кьвагьун, цIа ккана гIемертIалаяб минаялъуб. ГьебсагIат балагьаб иш ккараб рокъоре кIанцIун, эбелги кIиго гьитIинаб лъимерги хвасар гьаризе рортана ПирмухIамад ХIусеновги Ражаб Ризвановги. Гьел ккола Балтийск шагьаралда, контракталда рекъон, рагъулаб хъулухъ тIубалел ругел нилъер ракьцоял.
МЧСалъул хIалтIухъаби тIаде щвезегIан тIасияб тIалаялдаса гIумру гьабун ругел жеги кIиго чIужугIаданги, лъабго херал чагIиги хвасар гьаруна гьелго гIолохъабаз.
