29 сентябралда Сергей Меликов дандчIвана Росагролизинг АОялъул нухмалъулев Павел Косовгун. Нилъер республикаялдаги гьеб идараялдаги гьоркьоб къотIи-къай хъвана цадахъ рекъон хIалтIи гьабиялъул мурадалда.
ДандчIваялда гIахьаллъана ДРялъул хIукуматалъул вице-премьер ГIабдулмуслим ГIабдулмуслимовги РФялъул росдал магIишаталъул министрасул гIакълучи Юрий Касованги.
Гьел къотIи-къаязул кIудияб пайда бугин республикаялъул росдал магIишаталъеян абуна Сергей Меликовас, документалда гъоркь гъулбас гьабун хадуб.
ТIоцебесеб иргаялда, гьелъ рес кьолеб буго росдал магIишаталъул нигIматал хIадур гьаризе хIажатаб къайи-цIа босизе.
Гьединго рес ккезе буго кIикIундерил консервал хIадурулеб завод цIи гьабизеги. Жиндир заманалда гьеб завод букIана республикаялъул брендлъун.
Павел Косовас бицана жинда бихьулеб бугин Дагъистаналъул агрокомплексалъулаб бутIаялда гIемерисеб къайи-цIа басралъун букIин. Хехаб куцалда гьеб цIи гьабизе бугин абуна гьес.
