Жакъа тIолабго дунялалъулго аслияб масъалалъун лъугьун буго инсанасул сахлъи цIуни. Гьеб мурадалда гьабулеб буго гIемераб хIалтIи, тIоритIулел руго батIи-батIиял тадбирал. Масала, МахIачхъалаялда бугеб «Къункъраби» абураб гIелмиябгун сах гьариялъулаб комплексалдаги гIемер тIоритIула гьединал тадбирал. Гьезул хIакъалъулъ «ХIакъикъаталдасан» цебеги бицун букIана.
Дагьал церегIан къояздайин абуни комплексалда тIобитIана журналистазул гIахьаллъигун пресс-конференция. Гьениб бицана 26 январалда тIобитIизе бугеб «Межконфессиональное согласие — залог постковидной реабилитации и духовного возрождения России» абураб ТIолгороссиялъулаб гIелмиябгун практикияб конференциялъул хIакъалъулъ. Гьеб бухьинабун буго «Цолъи» абураб цIаралда гъоркь гIуцIулеб бугеб рухIиябгун лъай кьеялъулаб центр рагьиялда бан.
«Къункъраби» комплексалъул генералияв директор, МГУялъул профессор МухIамад МухIамадовасул хIаракаталдалъун тIобитIараб пресс-конференциялда бицана диназул рахъалъ гIадамазе кумек гьабизе бегьулел ресазулги. Масала, М. МухIамадовас абуна Дагъистаналъул муфтиясул, архиепископасул ва жугьутIазул динияв цевехъанасул пикруги къабул гьабун, комплексалда бан лъугIанин мажгитги, килисаги, синагогагиян.
— ЦIияб унтуде данде гьабулеб хIалтIулъ цIакъго кIудияб кIвар батана диниял идарабазул. Щайгурелъул мажгиталде, килисаялде, синагогаялде рачIунезда гьоркьоб бичIчIикьеялъул хIалтIи гьабизе цIикIкIараб рес букIуна. Гьединго лъабабго диналъул рукъзал рай — гьеб буго нилъер халкъазул цолъи бихьизабулеб мисалги.
«Къункъраби» комплексалда гIадамал сах гьариялъе хIисабалде босула инсанасул рекIел хIал, тIабигIаталдаса, хасго ралъдадаса щолеб пайда. Жакъа вирусалъул унтиялде данде гьарулел дарабазул абизегIанасеб пайда гьечIеб заманалда, гьединал рахъаздаса пайда боси буго лъикIаб иш. Гьелъ киналго разияб хIасилги кьолеб буго. Гьелдаго цадахъ гьеб хIалбихьиялъ рес кьола республикаялъул больницабазда гIадамал регизе бакIал эркен гьариялъеги. Гьединлъидал гьеб хIалбихьи халкъазда гьоркьосеблъун лъугьинеги рес буго, — ян бицана М. МухIамадовас.
МухIамадица ва гьес нухмалъи гьабулеб коллективалъ гьаб нухалдаги сах гьаризе жидехъего ахIулел руго коронавирусалъ унтун рукIарал ригьалде рахаралги ва мискинал хъизамаздасаги гIадамал.
2000 соналде дандеккун Россиялда 10 азарго больница къайги тохтурзабазул къадар 12 проценталъ дагьлъун букIинги хIисабалде босани, М. МухIамадовасул нухмалъиялда гъоркь гьабулеб хIалтIи буго цIакъго кIвар цIикIкIараблъун.
Комплексалда тIобитIараб пресс-конференциялда журналистазул суалазе жавабалги кьуна гьелъул генералияв директор М. МухIамадовас.
