ГIабдурашид Садулаевас бергьенлъи сайгъат гьабуна имам Шамилие

 

Дагъистаналде тIадруссана эркенаб гугариялъул рахъалъ Россиялъул тIасабищараб командаялъул мухъилъ Дунялалъул чемпионаталда церерахъарал Дагъистаналдаса спортсменал. Гьезда дандчIвай гьабизе МахIачхъалаялъул «Уйташ» аэропорталде щвана ДРялъул бетIерасул ва хIукуматалъул администрациялъул нухмалъулев Владимир Иванов, спорталъул министр МухIамад МухIамадов ва аза-азар дагъистаниял. Хадуб эркенаб гугариялъул ва боксалъул рахъалъ дунялалъул чемпионатазда лъикIал хIасилал рихьизарурал спортсменал ва гьезул тренерал къабул гьаруна ДРялъул бетIер Владимир Васильевас. Щварал бергьенлъабиги баркун, Дагъистаналъул бетIерас тIоцересел бакIал росарал атлетазе кьуна пачалихъиял шапакъатал.

Эркенаб гугариялъул рахъалъ дунялалъул чемпионат тIобитIана Казахстаналъул тахшагьар Нурсултаналда. Гьенир лъикIал хIасилал рихьизаруна Россиялъул тIасабищараб командаялъ. Олимпиялъул анлъго цIайиялда ункъо меседил медалалъе мустахIикълъана россиялъулал.
Бищунго тIадагьаб 57 кг цIайиялда цевевахъунев Хасавюрталдаса гугарухъан Заур Угуев финалалда дандчIвана Турциялдаса спортсмен Сулейман Атлыгун ва 3:13 хIисабгун бергьана дандиясдаса.
65 кг цIайиялда цоги дагъистанияв ХIажимурад Рашидов вахъана дунялалъул чемпионлъун. Финалалда гьев дандчIвана Казахстаналдаса гугарухъан Даулет Ниязбековгун. 11:0 хIисабгун бергьана ХIажимурад дандиясдаса.
74 кг цIайиялда Россиялъул байрахъалда гъоркь ургуялде вахъарав Северияб Осетиялдаса речIчIухъан Заурбек Сидаков финалалда дандчIвана Италиялдаса спортсмен Франк Чамизогун. Россиялъулав гьесдаса бергьана 5:2 хIисабгун. Сидаковас дунялалъул чемпионаталда къезавуна Америкаялъул Цолъарал Штатаздаса спортсмен, Олимпиялъул чемпион Джордан Бэрроузги.
86 кг цIайиялда Россиялъул тIасабищараб командаялда гъорлъ цевевахъунев Северияб Осетиялдаса спортсмен Артур Найфоновас гIей гьабуна мазгарул медалалда. Бащдаб финалалда гьев дандчIвана Ираналдаса спортсмен, Олимпиялъул чемпион ХIасан Язданишаратигун. ХIасаница россиялъулав тушеялда лъуна. Лъабабилеб бакIалъе гIоло Найфонов дандчIвана Сан-Мариноялдаса речIчIухъан Амин Майлза Наземогун ва бер­гьана гьесдаса 6:0 хIисабгун.
97 кг цIайиялда киналго балагьун чIун рукIана ГIабдурашид Садулаевасдагун Америкаялъул Цолъарал Штатаздаса гугарухъан Кайл Снейдерида гьор­кьоб букIине кколеб букIараб речIчIиялъухъ. Амма гьаб нухалда Азербайжаналъул тIасабищараб командаялъул рахъалдасан цевевахъунев дагъистанияв Шарип Шариповас бащдаб финалалдаго къезавуна американав. ГIабдурашидидагун Шарипида гьоркьоб букIараб финалияб къеркьеялъул гIадамазе цо кIудияб интерес букIинчIо. Гьеб къеркьеялда 4:0 хIисабгун Садулаев бергьана Шариповасдаса.
Гугарун хадуб букIараб пресс-конференциялда ГIабдурашид Садулаевас гьадин абуна: «Шарипов вуго къуватав гугарухъан. Гьединав вукIинчIевани, гьев Олимпиялъул чемпионлъунги вахъинароан. Дица жакъасеб бергьенлъи сайгъат гьабула Дагъистаналъулги Чачаналъулги имам Шамилие. Гьесда релълъараллъун рукIине хIаракат бахъула Кавказалъулго гIолилаз. Гьесул кIодолъиялъулги, гьес нахъе тараб ирсалъулги бицун хIалкIоларо», — ян.
Гьебго цIайиялда лъабабилеб бакI щвана Македониялъул тIасабищараб командаялъул мухъилъ цевевахъунев Дагъистаналдаса речIчIухъан МухIамадхIажи Нуровасе. Мазгарул медаль гьесие щвана 8:5 хIисабгун ургуялъул хважаин, Казахстаналдаса гугарухъан Ергали Алишерги къезавун. 97 кг цIайиялъул финалиял къеркьеял байбихьараб заманалда цо-цояз социалиял гьиназда хъвалеб букIана Казахстаналда эркенаб гугариялъул рахъалъ Дагъистаналъул чемпионат унеб бугин. Щайгурелъул финалалде ворчIарав ункъо спортсменасда гьоркьоса лъабго дагъистанияв вукIана, гьебги лъабав­го магIарулав.
Олимпиялъул гурел цIайиязул категориязда Россиялъул тIасабищараб командаялъе меседил медаль щвана гIицIго 70 кг цIайи­ялда. Гьеб категориялъул финалалда Северияб Осетиялдаса гугарухъан Давид Баев данд­чIвана Казахстаналдаса речIчIухъа­н Нуркожа Кайпановгун. 14:2 хIисабгун бергьана Давид дандиясдаса. Гьебго цIайиялда лъа­бабилеб бакIалъе мустахIикълъа­на Польшаялъул байрахъалда гъорк­ь цеве­ва­хъу­нев Дагъистана­лда­са спорт­смен МухIамадмурад ХIа­жиев.
Олимпиялъул гуреб цIайиялда, ай 92 кг цIайиялда мазгарул медалалда гIей гьабуна Россиялъул командаялъул речIчIухъан ГIали ЖабрагIиловас.
ПалхIасил, Казахстаналда бу­кIа­раб эркенаб гугариялъул ра­хъалъ дунялалъул чемпионаталда тIоцебесеб бакI ккуна Россиялъул тIасабищараб командаялъ. Гьединго россиялъулазе гьениб щвана анлъгоялда гьоркьоса щуго Олимпиялъул лицензияги, ай бищунго бакIаб цIайиялда хутIун.

Турниралъул хIасилал

Олимпиялъул цIайиялъул категориял:
57 кг 1. Заур Угуев (Россия) 2. Сулейман Атли (Турция) 3. Кумар Рави (Индия) 3. Нурислам Санаев (Казахстан) 5. Реза Атринагаричи (Иран) 5. Стеван Мичич (Сербия).
65 кг 1. ХIажимурад Рашидов (Россия) 2. Даулет Ниязбеков (Казахстан) 3. ИсмагIил Мусукаев (Венгрия) 3. Баджранг Пуния (Индия) 5. Такуто Отогуро (Япония) 5. Тулга Тумур Очир (Монголия).
74 кг 1. Заурбек Сидаков (Россия) 2. Франк Чамизо (Италия) 3. Джордан Барроуз (США) 3. Зелимхан ХIажиев (Франция) 5. Мао Окуи (Япония) 5. Дайнар Кайсанов (Казахстан).
86 кг 1. ХIасан Язданишариати (Иран) 2. Дипак Пуния (Индия) 3. Артур Найфонов (Россия) 3. Стефан Рейхмут (Швейцария) 5. Карлос Мендес (Колумбия) 5. Милес Амин (Сан-Марино).
97 кг 1. ГIабдурашид Садулаев (Россия) 2. Шариф Шарифов (Азербайжан) 3. Кайл Снайдер (США) 3. МухIамадхIажи Нуров (Македония) 5. Элизбар Одикадзе (Грузия) 5. Алишер Ергали (Казахстан).
125 кг 1. Гено Петриашвили (Грузия) 2. Таха Акгюль (Турция) 3. ХIасанбой РахIимов (Узбекистан) 3. Александр Хоцяновский (Украина) 5. Баджа Хутаба (Сирия) 5. Живей Денг (Китай).
Олимпиялъул гурел цIайиялъул категориял:
61 кг 1. Бека Ломтадзе (Грузия) 2. МухIамадрасул Идрисов (Россия) 3. Рауль Авар (Индия) 3. Бенам Эшанпур (Иран).
70 кг 1. Давид Баев (Россия) 2. Нуркожа Кайпанов (Казахстан) 3. МухIамадмурад ХIажиев (Польша) 3. Юнес Эмамичогаеи (Иран).
79 кг 1. Кайл Дейк (США) 2. Жаб­рагIил ХIасанов (Азербайжан) 3. Таймураз Салказанов (Сло­вакия) 3. ХIажи Набиев (Россия).
92 кг 1. Джейден Кокс (США) 2. Алиреза Карими (Иран) 3. ГIалихан ЖабрагIилов (Россия) 3. Иракли Мцитури (Грузия).