Божилъи ритIухъ гьабуна
Дагъистаналъул команда Ярыгинил турниралдаса тIадбуссана анкьго меседил медальгун
Гьал къоязда Красноярскалда тIобитIана эркенаб гугариялъул рахъалъ Иван Ярыгинил хIурматалда щибаб соналъ тIобитIулеб халкъазда гьоркьосеб турнир. Гьениб, кидаго гIадин исанаги, лъикIал хIасилал рихьизаруна Дагъистаналъул тIасабищараб командаялъ. Красноярскаялда цебебахъараб нилъер командаялъул мухъилъ вукIана 21 спортсмен. Гьезда гьоркьоса тIоцебесеб бакIалъе мустахIикълъана анкьгояв, кIиабилеб бакI щвана кIиягосе ва лъабабилеб бакIалда гIей гьабуна лъабгояс. Дагъистаналъул командаялъе тIоцебесеб меседиль медаль босана Хасавюрталъул Олимпиялъул нахъраталил училищеялда ругьун гьавулев МухIамадрасул Идрисовас (61 кг). Финалалда гьев 7:0 хIисабгун бергьана Румыниялъул рахъалдасан цевевахъунев Якутскалдаса спортсмен Николай Охлопковасдаса. Гьебго цIайиялда мазгарул медалалъе мустахIикълъана Хасавюрталдаса Рамазан Ферзалиев. Гьев бергьана монголав Отгонбаатар Гансухадаса 10:0 хIисабгун. КIиабилеб меседил медалалъе мустахIикълъана кIиго нухалъ дунялалъул чемпион МухIамадрасул ГъазимухIамадов (70 кг). Финалияб къеркьеялда гьес чIел босана Монголиялдаса спортсмен Мандахнаран Ганзоригида тIад. Гьебго цIайиялда лъабабилеб бакIалда гIей гьабуна Разамбек Жамаловас.
65 кг цIайиялда Ярыгинил Гран-приялъул чемпионлъун вахъана Хасавюрталдаса АхIмад Чакаев. Гьев дандчIвана Тываялдаса спортмен Начын Кууларгун ва бергьана 2:1 хIисабгун. Бащдаб финалалъул къеркьеялда Чакаевасукьа къурав цогидав дагъистанияв ХIажимурад Рашидов мазгарул медалалъе гIоло гугарана Кубаялдаса Кристиан Лопезгун. ХIажимурадица кубаялъуласда тIад бергьенлъи босана 2:1 хIисабгун.
79 кг цIайиялда финалияб къеркьеялда Хасавюрталдаса АхIмад ХIажимухIамадов дандчIвана гьебго шагьаралдаса МухIамад Рамазановгун. Ракьцоясда тIад 6:2 хIисабгун ракIчIараб бергьенлъи босана ХIажимухIамадовас. Гьеб ккола АхIмадие Ярыгинил хIурматалъе гIоло тIоритIулел турниразда щвараб ункъабилеб бергьенлъи. 86 кг цIайиялъул финалалда Даурен Куруглиевасда данде вахъана 2018 соналъул дунялалъул чемпион Турциялдаса ФатихI Эрдин. ХIалуцараб къеркьей унеб букIана кIиявго спортсменасда гьоркьоб тIоцебесеб периодалда. Хадуб ФатихIие сакъатлъи ккана ва нилъерасдаса гьев къуравлъун рикIкIана. 92 кг цIайиялда Хасавюрталдаса МухIамад Къурбановас къезавуна Монголиялдаса спортсмен Улзисайхана Баазанцога 13:2 хIисабгун.
Киназего интерес букIана 97 кг цIайиялда «Россиялъул танк» ГIабдурашид Садулаевасдагун Кайл Снайдерида гьоркьоб букIине бугеб къеркьеялъул. Амма Россиялъул тIасабищараб командаялъул капитанасе гьенив цевевахъине тренераз ихтияр кьечIо. ГIилла лъаларо. Кин букIаниги, Кайл Снейдер Ярыгинил турниралда къезавуна цогидав дагъистанияв Расул МухIамадовас 6:5 хIисабгун. Гьев кIиявго спортсмен дандчIвана лъабго нухалда. ТIоцебесеб нухалда Снайдерица Расул къезавун вукIана бигьаго. КIиабилеб нухалдаги нилъерав американасдаса къун вукIана, амма тIоцебеселда гIадин гуреб, гIезегIан гIетIги тIун.
Цоги медаль щвезе рес букIана Дагъистаналъул тIасабищараб командаялъе Ярыгинил турниралда. 57 кг цIайиялда финалалде ворчIана ГIабасхIажи МухIамадов. Гьесда данде вукIана Чачан Республикаялъул командаялъул мухъилъ цевевахъунев Хасавюрталдаса спортсмен Муслим Садулаев. Гьев кIиявго спортсменасда гьоркьоб букIараб хIалуцараб къеркьеялъул хIасил ккана 4:4. Бергьенлъи кьуна ахирияб балл босарав Муслимие.
ПалхIасил, анцIгоялда гьоркьоса анкьго меседил медальгун командабазда гьоркьоб тIоцебесеб бакI ккуна дагъистанияз.
Бихьинал гурелги, Ярыгинил турниралда гугаризе ургуялде рахъана руччабиги. Россиялъул тIасабищараб командаялъул спортсменал-ясазе гьениб щвана лъабго меседил медаль.
