- Я, дир вас! Дуца Аллагьасукьа хIинкъаразул гурони квенги кванаге ва гIакълуги дандбай хIакъикъиял гIалимзабазулгун.
- Дуца гьалмагълъи гьабе Аллагьасукьа хIинкъаразулгун. Мунагьал гьарулезулгун гьалмагълъи гьабуге. Гьезде гIазаб-гIакъуба щвезе бегьула ва гьеб мехалда цадахъ дудеги щола балагь.
- Мун вукIа лъикIал чагIазе лагълъун, киданиги квешазе гьудуллъун вукIунге.
- Мун тушманасдаса рикIкIалъе, гьудуласдасан цIодорлъиялдаги вукIа.
- Балъгояб жо бахчун толев чиясулъ букIуна лъикIлъи.
- Мун гIалимзабигун гьудуллъиялда вукIа ва гьезулгун дагIба-къецги гьабуге. Дунялги тIубанго реххун тоге, тани пакъирав, чияр горбода ваччаравлъун лъугьуна. Цо-цо къоялъ дуца кIал ккве, дурго шагьват бекизабун, дурго как-гIибадаталъе зарал кколеб хIалалъ кIалги ккоге, как бай кIал кквеялдаса хирияб бугелъул.
- Я, дир вас, хIусудчиясул лъабго гIаламат буго. АскIов гьечIеб мехалъ гьудуласде гъибат гьабула, вихьараб мехалъ хIелхIедула, дуде балагь щвараб мехалъ вохула.
- Дуца лъикIлъи гьабе гьелъул агьлуялъе, дуца гьеб гьабуге агьлу гурезе, мун дунялалда гьездасан щибго пайда щвечIого чIового хутIила ва ахиралда кириги щвеларо. Мун вукIа гьоркьохъевлъун, исрапчилъун вукIинчIого, ай мун бахиллъунги чIоге, исрап кколеб хIалалъги харж гьабуге.
- Мун чияде хIажалъуларедухъ вукIа.
- Жинда гьеб бичIчIулев чиясе гурони лъикIлъи гьабуге.
- Дунял буго нилъеца толеб нух, дуца гьеб къотIе, гIуцIизе лъугьунге.
- Мун дунялалде вачIараб къоялдаса нахъе гьеб дудаса лъутулеб буго, ахират данде бачIунеб буго. ХIакъикъаталдаги мун дуда данде бачIунеб рокъове гIагарав вукIуна, дудаса лъутун унеб рукъалдасаги.
