А. Степанов: «Дун чияр чи гуро»
Гьал къоязда Дагъистаналде вачIун вукIана РФялъул президентасул СКФОялда вугев вакиласул заместитель Игорь Рабков. Гьесул гIахьаллъигун тIобитIараб ДРялъул хIукуматалъул министразулги ведомствабазулгун низам цIунулел идарабазул нухмалъулезул цадахъаб данделъиялда гьес бицана, 20 августалдаса нахъе СКФОялда бугеб РФялъул президентасул вакиллъиялъул Дагъистаналъул рахъалъ федералияв инспекторлъун Александр Степанов тIамунин абун.
ЦIияв федералияв инспекторасул хIакъалъулъ гьадин абуна Игорь Рабковас: «Александр Степанов гьавуна Дагъистаналда. Гьес лъугIизабуна тIадегIанаб лъайкьеялъул кIиго идара. ХIалтIизе байбихьана МВДялда, хадуб прокуратураялда — батIи-батIиял хъулухъазда. Ахираб заманалда хIалтIулев вукIана Москваялъул регионазда гьоркьосеб транспорталъул прокурорасул тIоцевесев заместительлъун. Пачалихъияб хъулухъалда гьев хIалтIана гIаммаб къагIидаялда 25 соналъ», — ан.
Александр Степановас абуна Дагъистаналъул хIакъалъулъ жинда гIемераб жо лъалин. «Дун гьавуна Дагъистаналда, гьанив цIалана ва гьанисан ана армиялда хъулухъ гьабизе. Гьанир руго дир кьалбал. ГьабсагIаталда, республикаялъул нухмалъиялъул хIаракаталдалъун, Дагъистаналъул социалиябгун экономикаялда лъикIаб цебетIей буго. Дун чияр чиги гурелъул, диеги бокьун буго гьеб цебетIеялъулъ бутIа лъезе. РФялъул президентасулги, РФялъул хIукуматалъулги, РФялъул президентасул СКФОялда вугев вакиласулги тIадкъаязул хIакъалъулъ абуни, хьул буго бакIалъул нухмалъиялъул идарабазулгун цадахъаб хIаракаталдалъун Миллиял проектал тIуразарун бажариялде», — ян бицана Александр Степановас.
Гьединго гьес бицана дагьалъ цеве Дагъистаналде вачIун вукIарав РФялъул антимонополияб хъулухъалъул (ФАС) нухмалъулев Игорь Артемьевасулгун цадахъаб хIалтIиялъул хIакъалъулъги: «ФАСалъулгун хIалтIизе байбихьараб мехалда, Дагъистаналъул тарихалда жаниб тIоцебесеб нухалда рагьана кIиго уголовияб дело – картелазул ишазда бан. Гьелъухъ кIудияб баркалаги буго ФАСалъе. МухIканго гъорлъе ваккичIого, рехсон тела кIиго тарих: РФялъул ФАСалъул баяназда рекъон, 70 проценталъ дагьлъана хъулухъалдаса пайдаги босун гьарулел такъсиразул къадарги конкуренциялъул рахъалъ низам хвезабиялъул хIужабиги. Гьелде тIадеги, 40 проценталъ цIикIкIана пачалихъиял закупкабазулъ гIахьаллъулеб гIисинаб бизнесалъе кьолеб бюджетияб гIарцул къадарги», — ян бицана В. Васильевас.
Александр Степанов гьавуна 1974 соналъул 30 январалда Гъизляр районалъул Южное росулъ. 1997 соналда лъугIизабуна Дагъистаналъул пачалихъияб техникияб университет, 2000 соналда – Москваялъул пачалихъияб социалияб университет.
Хъулухъ гьабуна МВДялъул идарабазда — 2001-2018 соназда Ставрополь краялъул, Ханты-Мансийск автономияб округалъул, Тверь областалъул прокуратураялъул идарабазда, Москваялъул регионазда гьоркьосеб транспортиалъул прокуратураялда.
2019 соналъул 20 августалда тIамуна СКФОялда бугеб РФялъул президентасул вакиллъиялъул Дагъистаналъул рахъалъ федералияв инспекторлъун.
