FaceBook  in  yt  rss

11

«Машук - 2019»

ЦIиял гьудулзаби, цIиял ишал 

Пятигорскалда унеб бугеб Северияб Кавказалъул гIолилазул «Машук- 2019» форумалда гIахьаллъана Дагъистаналъул хIукуматалъул председатель Артем Здуновги. Цогидал регионазул премьер-министралгун цадахъ гьев дандчIвана гIолилалгун, щвана миллиял майданазде. Дагъистаналъул вакилзабаз гьалбадерида рихьизаруна халкъиял устарзабаз гьарурал гIарцул, хIатIул, цIулал тIагIелал, халичаби, цIарагI ва цогидабги. 

Артем Здунов дандчIвана Дагъистаналъул гIолилалгун. Гьез республикаялъул хIукуматалъул бетIерасе бицана жидерго проектазул хIакъалъулъ.
Масала, жиндирго планазул хIакъалъулъ бицана МГУялъул студентка Саида ХIажиевалъ. Гьелъ хIадурун буго «Туризм - киназего» абураб проект. Гьениб гIолилалъ кIвар кьолеб буго волонтеразул кумекалдалъун сакъатал гIадамазе сапарал гьаризе кумек гьабиялде.
- Дир кIудияб гъира буго сакъатал гIадамазе кумек гьабизе. Грант бергьани, рес букIана гьеб проект гIумруялде бахъинабизе, - ян абуна гьелъ.
Насрула Насрулаевасги бицана «Инженерная школа» абураб жиндирго проекталъул хIакъалъулъ. Цогидазги цере росана жидерго проектал. Масала, Дагъистаналда гIуцIизе бокьун бугеб СКФОялъул интеллектуалиял хIаязул централъул проект.
«БатIиял, амма бащадал» проекталда рекъон, коляскаялда ругел инвалидал батIи-батIиял махщелазе цIализаризе кумек щвезе рес буго. Гьеб проект мустахIикълъана гранталъе.
ГIолилазулги нухмалъиялъулгун бугеб бухьеналъул хIакъалъулъ гьикъана Хочбар Баркаевас
- ТIолгороссиялъул гIолилазул форумазда республикаялъул гIолилазул проектазе щола грантал. Дагьал церегIанги гьел бергьана «Территория смыслов», «Таврида» форумазда.
- Рехсарал проектал гIумруялде рахъинаризелъун гIолилазе кумек гьабизе рес бугищ нилъер исполнительнияб власталъул? – ян гьикъана гьес.
- Мун битIун тIаде ккана. Гьеб суалалда тIад ургъулел руго нижги. Гьаб­сагIаталда гьединаб хIалбихьи гьечIо, амма гьелъие нухал ралагьулел руго,- ян жаваб кьуна премьер-министрас.
Медицинаялъул университеталъул студенткаялъ бицен гьабуна онкологиял унтабазул. Гьелъ Артем Здуновасда гьарана халкъалда гьоркьоб цIех-рех гьабиялъе ва гIадамазул халгьабизе, цудунго унти тIатинабиялъе шартIал гIуцIизе кумек гьабейилан.
ГIолилаз жавабал кьуна премьер-министрасул суалазеги.
ГIолилазулгун дандчIваялдаса хадув гьев щвана проектазул аллеялде. СКФОялъе сайгъат гьабураб гьеб къо лъугIана кIудияб концерталдалъун.
Гьенибги Артем Здуновас гIолилазде хитIаб гьабуна.
- Биччанте нужер дандиял рукIине къуватал. Гьелъ гъира базабизе буго нужер проектазда тIад дагьалги лъикI хIалтIизе. Амма тадбиралъул аслияб рахъ – гьанир нужеда ратана цIиял гьудулзаби, цIиял ишал. Гьелъулъ буго нилъер къуват. Дицаги гьарула нужее бергьенлъи, икъбал, сахлъи ва сахаватлъи, - ян абуна гьес.

Прочитано 49 раз

Оставить комментарий

Убедитесь, что Вы ввели всю требуемую информацию, в поля, помеченные звёздочкой (*). HTML код не допустим.

 

ХIакъикъаТ 

Республиканская общественно-политическая газета на аварском языке.

 

Руководитель-главный редактор:

Камалов Али Ахмедович

_____________________________

 

f1  in1  yt1  rss1

_____________________________

 

Рейтинг@Mail.ru

Яндекс.Метрика

 

Фото

Настройка сайта

Цвет темы

Cyan Red Green Oranges Teal

Макет

Шир. Рам. Обрамл. Округл.
Изменение фонового рисунка
Вверх