ТIадбуссинабуна миллиардгун анлъго миллион гъуруш
2018 соналъул хIасилги гьабуна, исана тIуразе кколел
масъалабиги рорхана ДРялъул МВДялъул данделъиялда
Гьенир гIахьаллъана республикаялъул бетIер Владимир Васильевги, РФялъул президентасул СКФОялда бугеб вакиллъиялъул аппараталъул федералияв инспектор Алексей ХIасановги, ДРялъул хIукуматалъул тIоцевесев вице-премьер ХIажимухIамад ХIусеновги, ДРялъул хIукуматалъул вице-премьер Рамазан Жапаровги, къуваталъул идарабазул нухмалъулелги.
Данделъиялда ДРялъул МВДялъул министр ГIабдурашид МухIамадовас бицана дандчIварал захIмалъабазулги цебетIеялъе квербакъулел хIужабазулги хIакъалъулъ. Масала, гьес абуна республикаялда ахир лъунин изну гьечIого яргъид гIуцIарал къокъабазе. «ГьабсагIаталда валагьулев вуго гьединал къокъабазулъ гIахьаллъулев вукIарав микьго чи. Нижехъ ругел баяназда рекъон, гьел руго къватIисел улкабазда. ХутIулеб буго Интернеталъул сайтаздасан экстремизмалъулгун терроризмалъул идеология тIибитIизабиялъул балагь»,- ан абуна ГIабдурашид МухIамадовас.
Хасаб кIварбуссинабизе кколеб бугин абуна министрас экономикиял такъсиразде. «Бюджеталъул гIарац бикъиялдаги, экономикаялдагун предпринимательствоялда ва цIатариялъулгун энергетикаялъул комплексалда гьарулел такъсиразде букIине буго хасаб бербалагьи», — ян абуна гьес. Гьелдаго цадахъ республикаялда дагьлъун руго бикъа-хъамиялдаги зулму гьабиялдаги бан гьарурал такъсиразул къадар. Хехаб заманалда жанир рагьулел руго цебеккунго ургъун чи чIвай, чияр боцIи-мал хъамал гьаби, хъачагълъи ва машинаби рикъи гIадал такъсиралги.
ДРялъул МВДялъул министрасул заместитель – полициялъул начальник Дмитрий Гутыряца рехсана мухIканал хIужаби. «Экономикаялда гьарулел такъсирал дагьлъун ругониги, бакIал такъсиразул къадар бахана 44 проценталде. Гьединал такъсиразул 87,4 процент рагьана. Гьеб мурадалда гьарурал тадбиразул хIасилалда гьабун батана лъабго миллиардгун 154 млн гъуршиде зарал, тIадбуссинабуна гьеб гIарцул цо миллиардгун анлъго млн гъуруш.
Ришватчилъиялъул такъсирал рагьи лъикIлъана 19 проценталъ. Финансазулгун кредитазул рахъалъ гьабун буго 279 такъсир. Налогазул рахъалъ гьарурал такъсиразул къадар цIикIкIана 26,5 проценталъ», — ан бицана полициялъул начальникас.
Министерствоялъул хIалтIуе къимат кьолаго, ДРялъул бетIерас кIварбуссинабуна гьадинал хIужабазде.
1. Низам цIунулел идарабазул хIалтIухъабаз хIинкъигьечIолъи чIезабуна гъоркьиса республикаялда тIобитIараб 680 жамгIиябгун политикияб тадбиралда.
2. Террористазул къокъабазулъе гIолилал ккунгутIиялъул мурадалда, гIолилазе лъай кьезе куцазе ккола гIолохъанал учительзаби. Гьебго мурадалда хIалтIизе ккола Интернеталда заман инабулел гIолилалгунги.
3. Низам цIунулел идарабаз кумек гьабуна бюджеталъулаб гIарац букIине кколедухъ харж гьабизе.
4. ЦIикIкIун кIварбуссинабизе ккола нухазда низам цIуниялде.
Ахиралдаги гьадин абуна республикаялъул нухмалъулес: «Нуж ругьунлъана пайда кьоледухъ хIалтIизе. Гьанже аслияб масъала буго республикаялъул экономикаги пайдаяблъун гьаби. Нилъеда бараб буго нилъер лъималазулги Дагъистаналъулги къисмат. Цадахъ рекъон хIалтIани, гьеб масъала тIубазабун бажарула нилъехъа», — ян.
ДРялъул бетIерасулги ДРялъул хIукуматалъулги администрациялъул пресс-хъулухъ