Хасаб пикру

Лъица ва щай чIварав журналист?

Хашогги сабаблъун дунялалдаго бахъараб ахIи СШАялда
ва гьелъул гьудулзабазда «рагIулеб» гьечIо

СагIудиязул ГIарабиялдаса журналист Жамал Хашогги хIалтIулев вукIана «Вашингтон-пост» газеталда. Гьес гьоркьо-гьор­кьоб критика гьабулаан сагIудиязул принц МухIамад ибн Салманил политикаялъе. 4 октябралда Стамбулалда бугеб сагIудиязул консульствоялде арав гьев тIокIалъ къватIиве вачIинчIо ва араб бакI лъачIого тIагIана. Хадуб баянлъана консульствоялъул минаялъув гьев чIваравлъи. Гьебги лъана гьесул рукьалда бан букIараб сагIтил кумекалдалъун. СагIат букIун буго интернеталъулгун бухьен бугеб ва лъугьа-бахъунелъул баян къватIибе кьолеб. Гьелъул кумекалдалъун лъан буго гьесие консульствоялда гIакъуба кьолеб букIараблъи ва хадув чIваравлъи. Турказул тIалъиялъ лъазабуна Жамалил жаназа, къотI-къотIунги бан, кинабалиго канализациялъубе рехун бугиланги. Амма сагIудиязул дипломатаз гьелъул хIакъалъулъ щибго бицунеб гьечIо ва гьел, партизанал гIадин, руцIцIун чIунги руго.
Къираллъиялъул принц МухIамад ибн Салман ккола СагIудиязул ГIарабиялъул оборонаялъул министрги, коррупциялде данде къеркьолеб комитеталъул нухмалъулевги, руго гьес нухмалъи гьабулел жеги гIезегIанго идарабиги. Абула гьев цIакъ согIав чи вугиланги.
Эр-Риядалда бугеб Ritz Carlton абулеб отелалъур, (гостиница) гьесул нухмалъиялда гъоркь гIакъубаги кьун чанго чи чIваялъулги гIемер бицуна батIи-батIиял улкабазул СМИяз. ХIатта абула гьес гьеб отель битIахъе туснахъалде сверизабунцин бугилан. ХIалгьабун гьенире рачаразул гIемерисел араб бакI лъачIого тIагIунин ва къватIире рачIаразги жидерго буголъи принцасе «сайгъат» гьабулин гIемер бицуна СМИяз.
МухIамад ибн Салман рикIкIуна Ливиялъул премьер-министр СагIад Харири чIваялъе квербакъаравлъунги, ва гьев ккола Ираналде данде кьварараб политика хIалтIизабулезул цоявги. СШАялъул, Великобританиялъул ва ГIизраилалъул «гьудул» хIисабалда гьесда рагIи абизеги лъиданиги кIоларо. Щайгурелъул гьесул нухмалъиялда гъоркьлъидалха нус-нус миллиардазде гьел улкабазул ярагъ босулеб. МухIамад ибн Салманил лъикIаб гьоркьоблъи буго СШАялъул политиказулгунги ва хасго Трампил дурц Жаред Кушнерилгунги.
Консульствоялда журналист ч­Iваялъ цоги нухалда бихьизабуна Вашингтоналъги, Лондоналъги ва Тель-Авивалъги жидеего бокьараб гьабулеблъи ва демок­ратиялъул бицун гьел «гьудулзабазда» кIалъалареб­лъи. Гьеб лъугьа-бахъи­налда бан Турциялде гIайиб гьабизеги нахъекъазе рукIинчIо гьел. Турказда гьеб бичIчIун батизеги бегьула, гьез жидеего «цIодорлъи» гьабуна ва сагIудиязул дипломатаз­да гIайиб букIин чIезабулел далилал церелъуна.
Кин батаниги, гьадинал ишаз СагIудиязул ГIарабиялъул гуребги, тIолабго исламалъулго къадру хвезабулеб букIин хIакъаб буго. Гьеб улкаялълъидалха жибго рикIкIунеб исламалъул ракIлъун. Хасго исламалъул «тушбабилъун» рикIкIунел СШАялъулгунги ГIиз­раилалъулгунги гьудуллъи гьабиялъги бихьизабулеб буго СагIудиязул ГIарабиялда гьабулебщинаб ритIухълъи цIунун гьабулеб гьечIеблъи. Гьединаб политика билълъанхъизабулеб букIиналъ сагIудиязул къадруги, масала, Ираналде дандеккун, гIодобе кколеб буго. Хасго Иерусалималъул суалалда сверухъ лъугьун бугеб ахIвал-хIалалда бан. Гьебго заманалда исламалъул тушбабаз кIвараб хIаракатги бахъулеб буго шигIиялги сунниталги цоцазде данде гьусизеги. Гьеб бихьулеб батила сагIудиязул къираллъиялдаги, амма гьез СШАялда ва ГIизраилалда цебе бетIер «салулъ къазабулеб» буго.
Денга Халидов