FaceBook  in  yt  rss

Лизингалги микрозаймалги Лизингалги микрозаймалги

Нилъер гьаниб гIадатлъун лъугьун буго, жидерго хIалтIи гьабулаго пачалихъалъул идарабазул рахъалдасан квалквал гурони кумек щвей щакаб жо бугин абураб пикру. Амма руго цогидал мисалалги. Маса­ла, гьединазул цояб ккола «Дагълизингфонд» компания. Гьелъул нух­малъулев, Шамил районалъул КъахIиб росулъа МухIамад ГIариповгун дандчIвана ниж гьел къоязда.

Лизингалги микрозаймалги

 

 

- МухIамад, нужер компани­ялъул аслияб хIалтIи буго лизин­говиял (байбихьуда багьаялъул цо бутIаги кьун, хутIараб къадар хадубккун, чIезабураб болжалал­да кьезелъун щиб бугониги боси) хъулухъал тIурай ва хIалтIулел предприятиязе микрозаймал (къарзалъе гIарац) кьей. Дагьаб мухIканго бицани, щиб жо кколеб «лизинговиял хъулухъал тIурай»?

- ДРялъул хIукуматалъ нижер компания (гьелъул учредитель кко­ла предпринимательствоялъулгун инвестициязул агентство) гIуцIун букIана 2013 соналда. Гьелъул му­радги букIана гьитIинаб ва гьор­кьохъеб бизнесалъул предприятиязе лизинговиял хъулухъал тIурай. Ни­жеца гьезие кьола техника, транс­порт ва алат-къайи. Масала, пред­приятиялъе къваригIун буго пуланаб техника, амма гьелъул гьечIо гьеб босизе рес. Гьедин бугеб мехалда, предприятиялъул вакилзаби рачIуна нижехъе, гьарула къотIи-къаял, гьез кьола багьаялъул цо бутIа, хутIарабги тIаде рехун, нижеца гьезие чIезабула хIажатаб техника. Багьаялъул ниже­ца кьураб бутIа гьез тIад буссинабу­ла бихьизабураб болжалалда жаниб. Нижеца кумек гьабизе ккани, руго цIунизе кколел шартIалги: предпри­ятиязул хъвай-хъвагIай букIине кко­ла Дагъистаналда ва гьезул аслияб хIалтIиги букIине ккола гьанибго. Федералиял законазда рекъон, ни­жер ихтияр гьечIо акцизалъулал бутIабазде (бензин, мехтизарулел гьекъолел жал гь. ц.) ва тIабигIиял магIданал рахъиялъул хIалтIабазда гьоркьоре лъугьине.

Нижеца яхI бахъула гьез хIадур гьаризе кколел документазул къа­дар дагь гьабизе (5 лъагIалида жаниб дагьлъана 2 нухалъ), кIванагIан би­гьа гьабула гьезул цогидаб хIалтIи.

 

 

- Кинаб бугеб нужеца техника, алат-къайи кьолеб къагIида ва киса гьеб босулеб?

- Техника кьола 5, алат-къайи 7 сонил болжалалда, лъагIалие гьезул багьаялъул хиралъиги ккола 6 про­цент (мисалалъе, техникаялъул багьа 1 млн гъурущ бугони, цо лъагIалида жаниб тIаде бачIуна 60 азарго гъу­рущ). Багьаялъул тIоцебесеб бутIа, ай гьелъул 10 процент (нижеца хIалтIи байбихьулеб мехалда гьеб букIана 30 процент) кьезе ккола бай­бихьуда, хутIараб кьола тIадехун рехсараб болжалалда жаниб. Заяв­ка кьолаго, бизнесчияс бихьизабула хIажатаб техникаялъул тайпа ва гьеб бугеб бакI.

 

 

- Аслияб куцалда кинаб тайпа­ялъул техника тIалаб гьабун ну­жехъе бизнесчагIи рачIунел?

- Техника ва алат-къайи букIине бегьула бокьараб тайпаялъул – ра­лел бакIазда ва нухал къачIалаго хIажалъулелдаса байбихьун, меди­цинаялде гIунтIун. Заявкабазул 40 процент букIуна МахIачхъалаялдаса, руго Казбек, МухIарамкент, Сер­гохъала ва цогидал районаздасагун шагьараздаса.

 

 

- Щиб жо кколеб «микрозайм»?

- Микрозайм ккола чIезабураб за­маналда (3 лъагIалиде щвезегIан) ва чIванкъотIараб къадаралда (5 млн щвезегIан) кьолеб гIарац. Гьеб­ги кьола нилъер республикаялда хъвай-хъвагIай бугел, жидер аслияб хIалтIиги гьаниб гьабулел гьитIинаб ва гьоркьохъеб бизнесалъул пред­приятиязе. Добго хIисабалда гьеб кьезе ихтияр гьечIо акцизияб къайи биччалел ва ракьулъа тIабигIиял магIданал рахъулел предприятиязе. Гьеб кьола росдал магIишаталъул ва кванил нигIматазул предпри­ятиязе (СПК, КФХ ва гь. ц). Гьелъул буго чанго тайпа: инвестициялъу­лаб (техника ва алат-къайи босизе); стандартияб (заманалъулаб хIалтIи тIубаялъе гIарац данде гьабизе); ре­финансированиялъулаб (банкалдаса босараб кредит бецIизелъун кьолеб). Гьаниб рехсараб лъабабилеб тайпа­ялъул буго гьадинаб къагIида. Ми­салалъе, лъагIалие кIудияб процент тIаде кьезелъун (17 процент) банкал­даса дуца босун буго пуланаб къа­дар гIарцул. Дуда кIолеб гьечIо гьеб бецIизе ва мун вачIана нижехъе. Ни­жеца бецIула гьеб гIарац, къала кре­дит ва дуца гьеб налъи кьола нижее, амма гIемерго дагьаб (2 процент) гIарацги тIаде рехун.

 

 

- КIудияб налъиги бецIун, да­гьаб гIарац щолеб хIалтIул магIна щиб?

- Гьелъул магIна буго гьитIинаб ва гьоркьохъеб бизнесалъе квербакъи гьаби. ГьитIинаб багьаялда (ниже­даса учузго хIалтIулеб идара гьечIо республикаялда) нижеца хIалтIи гьа­була пачалихъалъул кумекалдалъун. Гьелъие бихьизабун буго пачали- хъияб хасаб программа (федералияб ва республикая-лъулаб).

 

 

- Нагагьлъун бизнесчиясда кIвечIони гIарац жидер заманалда тIад буссинабизе…

- Микрозаймал кьеялъул хIалтIи нижеца байбихьана исана их­дал, гьанжелъизегIан гьеб кьуна 19 бизнесчиясе (46 млн гъурущ). ГьанжелъизегIан ккечIо гьединаб иш, хадубккунги ккезе батиларин абураб хьул буго нижер.

 

 

- Микрозайм щвей захIматаб масъала бугищ?

- Нижер мурад гьечIо гьеб захIмат гьаби, гьелъул гIаксалда, нижеца ки­набго гьабула бигьалъиялъе. Гьелъ­ие гьабизе кколеб мухIканго баян гьабун буго нижер сайталдаги. Биз­несчияс цIезабизе ккола анкета-заяв­ка, кьезе ккола хIалтIул хIасилазул хIисаб-суал. Гьеб кинабго гьабизе бегьула электроннияб къагIидаялда, гьев живго нижехъе вачIани гIола цохIо къотIи-къаязда гъоркь гъулбас гьабизе. Амма гIарац щвеялъе руго гьес цIунизе кколел шартIалги – гье­сул букIине бегьуларо бецIичIеб кре­дит ва судалъул идарабазул рахъал­дасан рукIине бегьуларо киналгIаги суалал.

 

 

- 2013 соналдаса нахъе кумек гьарун нужехъе рачIунезул къадар цIикIкIунебищ бугеб ялъуни дагь­лъулебищ? Коронавирусалъул за­маналда нужер хIалтIи хисанищ?

- Нижер ресалда бараб букIуна ни­жехъе рачIунезул ва гьарулел къотIи- къаязул къадар. Мисалалъе, исана, гъоркьисалалде дандеккун, гьабуна чанго нухалъ цIикIкIун къотIи-къай. Микрозаймазда хурхараб хIалтIи цебе иналъе, исана республикаялъул хIукуматалъ нижее биччана 300 млн гъурущ, лъагIел лъугIилалде, гьеб тIубанго хIалтIизабизеги ккола. Ко­ронавирус байбихьарабго, ккана нижер хIалтIулъ дагьабго лъалхъи, амма, хехал тадбиралги гьарун, ни­жеда кIвана гьеб низамалде бачине. Лизинговияб хIалтIулъ нижеца 3 моцIалъ нахъе цIана предприятияз нижее гIарац кьезе кколеб букIараб болжал. ТIоцебесеб апрелалде гьа­бун букIараб 16 къотIи-къаялда ба­гьа гIодобе бачана 1,5 млн гъуру­щалъ. Кьолел микрозаймазда тIаде бачIунеб процент дагь гьабуна 2 ну­халъ. Гьеб киналъулго хIасилалда, 1 июлалдаса нахъе гIемерго цIикIкIана нижехъе рачIунезул къадарги.

 

 

- МухIамад, мунагьал чураяв дур эмен, ХIажи ГIарипов, гIемерал соназ хIалтIана «ХIакъикъат» («БагIараб байрахъ») газеталда, вукIана гьелъул бетIерав редак­торлъун…

- «ХIакъикъат» ккола нижер «хъи­замалъул газета». ГIемерал соназда эмен хIалтIана батIи-батIиял идара­базда, батIи-батIиял хъулухъазда, амма, дир хIисабалда, бищунго хи­рияб ва гIагараблъун гьесие букIана магIарул газета.

 

Прочитано 141 раз

Оставить комментарий

Убедитесь, что Вы ввели всю требуемую информацию, в поля, помеченные звёздочкой (*). HTML код не допустим.

 

ХIакъикъаТ 

Республиканская общественно-политическая газета на аварском языке.

 

Исполняющий обязанности главного редактора:

Умахан Амирханович Умаханов

_____________________________

 

f1  in1  yt1  rss1

_____________________________

 

Рейтинг@Mail.ru

Яндекс.Метрика

 

СМИ

Учредитель сетевого издания ГБУ РД "Редакция республиканской газеты "Истина".
Зарегистрирован Федеральной службой по надзору в сфере связи , информационных технологий и массовых коммуникаций .
vozrastСвидетельство о регистрации средства массовой информации Эл № ФС77-73996 от 19 октября 2018 года.

 

 

Фото

Настройка сайта

Цвет темы

Cyan Red Green Oranges Teal

Макет

Шир. Рам. Обрамл. Округл.
Изменение фонового рисунка
Вверх