Британиялъул халкъазда гьоркьосеб цIех-рехалъул централъ лъазабухъе, сагIудиязул руччабаз лъабабилеб бакI кколеб буго берцинлъиялъул рахъалъ.
Гьезда цере руго Венгриялъулги Польшаялъулги руччаби. «Аль-Арабия» телеканалалъ лъазабухъе, цIех-рехалда аслияб кIвар буссинабун буго берцинлъиялде, сабурлъиялде, гIаданлъиялде ва кидаго гьединайлъун цIунун хутIиялде.
Гьединго, кIвар кьолеб букIана тIабигIияб берцинлъиялдеги, бихьинал жидедего мукIур гьаризе кIвеялдеги, ай жидехъ гIенеккулеллъун гьариялде. Гьениб аслияб бакI ккуна сагIудиязул бихьиназул жидерго руччабаздехун бугеб балагьиялъги.
ХIисабалде росана бихьиназ руччабазул гьари къабул гьаби гIадинал, гьезие кумекчагIи, хъулухъчагIи кквей гIадинал, руччаби хIалтIизе ккунгутIи гIадинал хIужабиги. Гьединго халгьабуна бихьиназ, жидехъ гIарацги букIун, руччабазул хIажатал тIураялде кьолеб кIваралъулги.
ХIисабкьеялда бихьизабулеб буго сагIудиязул руччабазул гIумру ханзабазул гIадаб букIин: «Ханасул чIужуялъ машина бачунаро, гьеб бачине хъулухъчи вукIуна». Хасаб бицен гьабун буго сагIудиязул руччабаз жидерго черх цIуниялъул хIакъалъулъги. Гьезул ретIел черх бахчараб букIиналъ, къватIиса кколеб заралалдаса цIунун, гьезул тIом хутIулеб буго цIвакараб дарай гIадин ва гIолохъанго.
