17 марталда ДРялъул хIукуматалда тIобитIараб данделъиялда гьоркьоб лъун букIана ччугIил магIишат цебетIезабиялда хурхараб суал.

    ЧчугIа гIезабулел магIишатазе субсидияздалъун санайилго пачалихъалъ кумек гьабулин бицана хIукуматалъул председатель ГIабдулпатахI ГIамирхановас. Амма ччугIа къачIан, хIадур гьабиялъул иш роцIинабизе къваригIун бугин тIадеги жубана гьес. Республикаялда гьелъие шартIал гьечIолъиялъ ччугIа къватIибе баччулеб буго, гьелдалъун бакIалъул бюджеталъе заралги кколеб буго гьенире налогал рачIунел гьечIолъиялъ.

   ДРялъул тIабигIаталъул бечелъабазул министрасул ишал тIуразарулев РахIман ХIамидовас бицана 2019 соналда республикаялда ччугIа гIемер ккунила. Амма гьелдаса кIиго нухалъ цIикIкIанила гьеб гъоркьисала. Масала, 2020 соналда Дагъистаналда ккун буго ччугIил 22 азарго тонна. Гьелда гьоркьоб гIемерисеб килька букIана.

   Гьединго 2018 соналда байбихьана МахIачхъалаялъул порталда ччугIил терминал къачIазеги.

   ХIамидовасда лъикIаблъун бихьулеб буго зама-заманалдасан республикаялда ччугIил ярмаркаби тIоритIизеги.

   А. ЮСУПОВ