ЦIумада
14 февралалда ТIаса Гьаквари росдал бегавул Сулейман Сулеймановас росуцоязе хIисаб кьуна гъоркьиса гьабураб хIалтIул.
Росдал бюджеталда бихьизабураб гIарцул къадар букIана 1 млн 776 азарго гъурущ. 105 проценталъ ракIарун руго киналго налогалги.
ГIолилалги хIалае рахъун, гъоркьиса росулъ гьарурал аслиял хIалтIаби ккола шагьранухал къачIай. Гьелъие районалъул нухазул фондалдаса 200 азарго гъурущги биччан букIана. Чабхилгун ракьул цIураб 200 КамАЗги чIехьана гьел нухазде.
ДРялъул Халкъияб Собраниялъул депутат ГIабдурахIман Камиловас сайгъат гьабураб тракторалъулги кIудияб кумек щолеб буго гьеб рахъалъ.
ЦIумада райадминистрациялъул пресс-хъулухъ
БежтIа
Участокалъул бетIерасул ишал тIуралев ХIусен ХIайбулаевас тIобитIараб данделъиялда аслияб суаллъун букIана КIудияб Бергьенлъиялъул байрамалде хIадурлъи гьаби.
ЦIи гьарун къачIазе руго бахIарзазе рарал памятникал. Гьединго БежтIа участокалъул гIадамал гIахьаллъизе руго «Георгиевская ленточка», «Хвел гьечIеб полк», «Солдатасул карщ», «РакIалдещвеялъул вахта», «Бергьенлъиялъул байрахъулал» абурал ТIолгороссиялъул акциязда ва проектазда.
Хьаргаби
МахIачхъалаялда, SMMET централда тIобитIана КIудияб Бергьенлъиялъ 75 сон тIубаялъул хIурматалда районалъул гIолилазда гьоркьоб интеллектуалияб хIай. Гьелъухъ ралагьизе рачIун рукIана районалъул имам ГIали-хIажи МухIумаев, «Аварал» абураб жамгIияб гIуцIиялъул председатель Арсен МухIамадов, районалъул гIолилал ва цогидалги гьалбал.
ХIаязда гIахьаллъана районалъул лъабго команда.
ТIоцебесеб бакIалъе мустахIикълъана ГIаймаки росдал команда, кIиабилеб бакIалде бачIана Дарада-Мурада росдал команда, лъабабилеб бакI ккуна хъвартихьунисез.
