Дагъистаналда бищунго машгьураб спортивияб школалъун рикIкIине бегьула, гIадамаз Маркаровасулинги абула гьелда, "Лъи­малазулгун гIолилазул Олимпиялъул нахъраталил школа". Ахираб 20 соналда жаниб рехсараб спортивияб школалъ къватIиве виччана нус-нус футболисталги, тхэквондисталги, каратисталги, волейболи­сталги, хIатта шахматисталгицин. Амма гьезда гьоркьор бищунго машгьураллъун ккола футболистал - Шамил ЛахIиялов, Мурад Ра­мазанов, Нарвик Сирхаев, Расим ТIагьирбеков ва гIемерал цогидал. Футболалде цIикIкIун кIвар кьолеб букIиналъе гIиллалъунги ккола живго спортивияб школалъул директор Александр Маркаровги Совет Союзалъул машгьурав футболистлъун вукIараблъи. 70-абилел соназда Дагъистаналде вачIарав гьев лъугьана МахIачхъалаялъул "Динамо" командаялъул бищунго лъикIав футболистлъун. Гьесго кьучI лъуна МахIачхъалаялъул "Анжиялъеги".

Гьал къоязда рехсараб спортиви­яб школалде щварав дида Марка­ров ватана гьитIичазе футболалъул хIакъалъулъ бицунев, гьезие цо-цо балъголъаби рагьулев.

- Гьал руго Дагъистаналъул фут­болалъул букIинесеб. Нижер шко­лалда гIемер руго гьунар бугел гьитIичалги, гьединго гIолилалги. Амма аслияб жо киналго кутакал спортсменаллъун рахъин гуребха, аслияблъун ккола гьазие лъикIаб тарбия кьей, битIарабгун тIекъаб бичIчIулел гIадамаллъун лъугьина­ри. ЛъикIав спортсменлъун бокьа­рав вахъине бегьула, амма гIадан яхI-намусалде куцазе батана цIакъ захIматаб ишлъун.

- Лъида абизе бегьулеб лъикIав футболист вугин, кинал хаслъаби рукIине кколел гьесулъ?

- Цо-цояз, гIемер заманалъ го­лал кьабулел гьечIониги, пуланал футболистал рикIкIуна лъикIал гьужумалъулаллъун. Амма голал кьабуларел гьужумалъулалги, гьел кьабизе ресал ралагьуларел полуза­щитникалги, дандиязул гьужумаз­даса жидерго гIакIаялъул площадка цIунуларел защитникалги, букIине кколеб къагIидаялда кавабахъ эхе­тун бажаруларел голкипералги кин­ха лъикIаллъун рикIкIинел? Щивав чияс тIубазабизе ккола тIадкъараб иш. Гьужумалъуласул техникаги, дандияв гуккизе бугеб гьунарги тренерасе щай, гьес голал кьабулел гьечIони? Цоги нухалъ абила, фут­болистасе аслияблъун ккола трене­рас бихьизабураб бакIалда хIасил кьоледухъ хIай.

- Жакъа Дагъистаналда футбол кинаб даражаялда бугеб?

- Россиялдаго босани, Дагъиста­налда футболалъул даража гьоркьохъеб хIалалда бугин абуни мекъи ккеларо. Амма, ракIчIун абизе кIола, футбол бокьиялъул рахъалъ нилъ.

руго тIоцебесеб бакIалда. ГIемер руго пагьму-гьунар бугел гIолилал. ГьабсагIаталда гьезда гьоркьов би­щунго цеветIуравлъун рикIкIине бегьула "Уфаялъул" гьужумалъулав ХIамид Агъаларов. РПЛалдаги ва гьединго, Россиялъул гIолилазул тIаса бищараб командаялъул мухъилъги гьес щибаб хIаялда кьабу­лел руго голал. Гьев ккола нижер спортивияб школа лъугIарав футбо­лист.

- Футбол гуребги, дур школал­да руго батIи-батIиял спортивиял секциял. Цогидал рахъазда ругищ бергьенлъаби?

- Боксалъул рахъалъ Россиялъул чемпион, Олимпиялъул хIаязул гIахьалчи ШагьгIабас МахIмудов, шахматазул рахъалъ халкъазда гьоркьосев гроссмейстер Жакай Жа­каев, тхэквондоялъул рахъалъ Олим­пиялъул чемпион Радик ГIисаев - гIемер руго нижер школа лъугIарал цIар рагIарал спортсменал. Амма футболалде кьола аслияб кIвар.

- Чан сон базегIан ригьалъул лъимал ва гIолилал спортивияб школалъ къабул гьарулел?

- Нижер школалда ругьун гьару­лел руго 5-ялдаса 19 сон базегIан лъимал ва гIолилал. Гьединго гьа­нире хьвадула техникияб универси­теталъул студенталги.

Темирхан ХIАСАНОВ