«Россиялъул танк» — «Дагъистаналъул халкъияв БахIарчи»
Сайгидпаша ГIумахановас ГIабдулрашид Садулаевасул каранда бана орден
Гьал къоязда Хасавюрталда тIобитIана Континентазда гьоркьосеб эркенаб гугариялъул рахъалъ турнир. Бергьарал щугоязда гьоркьоса ункъоял рукIана дагъистаниял. Щуабилев вукIана Кабардино-Балкариялдаса Анзор Уришев. ГIемер къо бихьичIого кIиабилеб нухалдаги Континентазда гьоркьосеб кубок щвана Анзорие. Гьединго кIиабилеб нухалдаги бергьана Хасавюрталдаса Разамбек Жамаловги Халил Аминовги.
Дунялалъул лъабцIул, Европаялъул кIицIул ва Олимпиялъул чемпион ГIабдулрашид Садулаевасе «Дагъистаналъул халкъияв БахIарчи» абураб цIарги орденги кьуна Хасавюрталда тIобитIараб эркенаб гугариялъул рахъалъ турниралда. Машгьурав спортсменасул каранда орден бана ДРялъул промышленносталъулгун энергетикаялъул министр Сайгидпаша ГIумахановас.
Дагьаб цебе «Дагъистаналъул халкъияв БахIарчи» абураб цIарги орденги кьун букIана UFCялъул чемпион ХIабиб НурмухIамадовасеги.
