Назрань шагьаралда тIобитIана эркенаб гугариялъул рахъалъ Россиялъул чемпионат.
Гьелда гIахьаллъана Дагъистаналъул тIасабищараб командаги. Экспертаз абулеб букIана исана гIадинаб къуватаб команда нилъер кидаго букIинчIин, ай щибаб цIайиялда бергьенлъи босун бажарулел, хIалбихьи бугел спортсменал рукIанин. Экспертазул гьеб пикру ритIухъ гьабуна дагъистанияз чемпионаталъул тIоцебесеб къоялъго. Россиялъул чемпионлъун вахъана 61 кг цIайиялда ХIажимурад Рашидов. Финалалда гьев дандчIвана Якутиялдаса Виктор Рассадингун. Бекхан Гойгереевасе щвана лъабабилеб бакI. Финалалда 70 кг цIайиялда дандчIвана кIиго дагъистанияв: МухIамадхIабиб КъадимухIамадовгун МухIама ДибирхIажиев. Гьеб къеркьеялда дандиясдаса къуват цIикIкIана МухIамадхIабибил.
КIиабилеб къоялъ 57 кг цIайиялдаги финалияб речIчIи букIана кIиго дагъистаниясда гьоркьоб. ХIалуцараб къеркьей букIана Хасавюрталдаса спортсменал Заур Угуевасдагун Артем Гебековасда гьоркьоб. 3:1 хIисабгун бергьенлъи босана Заурица. Щибго щаклъи букIинчIо 86 кг цIайиялдаги меседил медаль Дагъистаналде бачIине букIиналда. Щайгурелъул гьеб цIайиялда Европаялъул чемпион Шамил КIудиямухIамадов гугаризе вукIун. Финалалде щвезегIан щибго гIакъуба бихьичIого бергьана гьев дандияздаса. Амма финалалда нилъерасе битIккечIо. Чанго нухалъ хIалбихьана Шамилица дандиясде гьужум гьабизе. Кин къеркьаниги, жиндиего щварал баллалги цIунун чIарав асатIинав Владислав Валиев гьесда къуркьизавизе кIвечIо. Чемпионат лъугIун хадуб Владислав мукIурлъана жив дагъистаниясдаса цевеккун чанго нухалъ къун вукIиналъе. Гьединлъидал, рес буго гьев кIиявго цоги нухалъ гугаризе тIамизе ва бергьарав дунялалъул чемпионаталде витIизе.
БакIаб, ай 125 килограммалде щвезегIан цIайиялда Дагъистаналъул командаялда гъорлъ къуватав спортсмен гьечIин абулеб букIана. Амма гьеб гьедин гьечIолъи бихьизабуна МухIамадхIажи Нурасуловас. Жиндаго 104 кг цIайи гурого гьечIониги, ракIчIараб къагIидаялда бергьана гьев залимал дандияздаса. Амма, КIудиямухIамадовасего гIадин, битIккечIо гьесиеги финалалда. Санкт-Петербургалдаса Анзор Хизриевасдасаги къун, гIарцул медаль щвана дагъистаниясе.
Чемпионаталъул ахирисеб лъабабилеб къоялъухъ балагьун чIун рукIана киналго. Щайгурелъул жиндие цIияблъун кколеб 97 кг цIайиялъул категориялда ургуялде «Россиялъул танк» ГIабдурашид Садулаев вахъине вукIун. Финалалде щвезегIан цогIаги балл кьечIо гьес дандиязе, ай 42:0 хIисабгун вахъана гьев аслиб къеркьеялде Северияб Осетиялдаса Владислав Байцаевасда данде. Рехсараб цIайиялда хIалбихьи гьечIолъиялъ батила, ГIабдурашидица гъалатIал риччана гугарулаго. Жиндасаго залимав Владислав тIасан нахъеги рехун гIодов лъезе хIалбихьана гьес, амма бажаричIо, ва асатIинас, данде приемги гьабун, чанго балл босана. ГIабдурашидица дандиясда хадуб бихьизабуна гьев щивгун гугаризе ургуялде вахъун вугевали. Чанго приемги гьабун, 8:7 хIисабгун лъабабилебги нухалъ Россиялъул чемпионлъун вахъана ГIабдурашид.
ХIасилал:
57 кг: 1. Заур Угуев (Дагъистан) 2. Артем Гебеков (Дагъистан) 3. Омак Сюрюн (Тыва-Новосибирск) 3. Дмитрий Аксенов (Саха-Якутия).
61 кг: 1. ХIажимурад Рашидов (Дагъистан — Москва) 2. Виктор Рассадин (Якутия — Крым) 3. Бекхан Гойгереев (Дагъистан — Чачан) 3. Ислам Дудаев (Чачан).
65 кг: 1. Алан Гогаев (ХМАО-Алания) 2. Муршид Муталимов (Дагъистан) 3. Куулар Начын (Тыва-Красноярск) 3. Имам Ажиев (Дагъистан)
70 кг: 1. МухIамадхIабиб КъадимухIамадов (Дагъистан) 2. МухIамад ДибирхIажиев (Дагъистан — Иваново) 3. Давид Баев (ХМАО — Алания) 3. Расул Жукаев (Чачан).
74 кг: 1. Хетик Цаболов (Москва область — Алания) 2. ХIажи Набиев (Дагъистан) 3. Алан Засеев (Алания-МОС) 3. Никита Сучков (Красноярск)
86 кг: 1. Владислав Валиев (ХМАО — Алания) 2. Шамиль КIудиямухIамадов (Дагъистан) 3. АрсенгIали Мусалалиев (Дагъистан) 3. Анзор Уришев (Красноярск-Кабардино-Балкария)
97 кг: 1. ГIабдурашид Садулаев (Дагъистан) 2. Владислав Байцаев (Ставрополь-Москва) 3. Расул МухIамадов (Дагъистан) 3. Юрий Белоновский (Красноярск)
125 кг: 1. Анзор Хизриев (Санкт-Петербург) 2. МухIамадхIажи Нурасулов (Дагъистан) 3. Цыбик Максаров (Бурятия) 3. Адлан Ибрагьимов (Чачан Республика).
