ТIадеялдаса тIаде цIикIкIунеб буго коронавирусалъ унтиялъул хIужаби. Гьедин бугониги, кинавго чи гуро кантIулев вугев вакцина гьабизе кколеблъиялде. Амма, заманалъул тIалабалги хIисабалде росун, инсанас жиндирго махщелцин хIалтIизабулеб буго ковидалде данде къеркьеялъул мурадалда. Масала, нижер цо гьалмагъас махх регъезе бугеб махщалидаса пайдаги босун, гьабун буго бекерун унеб чода рекIарав магIаруласул, бецIаб сардилъ жиндирго карандаса бахъун ракIгун, гьебги борхун ккун, сверухъ ругезе канлъи кьурав М. Горькиясул герой Данколго гIадин, ковидалъул унтиялде данде чIвалеб рукIкIенги босун, гIадамазухъе гIедегIун унев магIарул рекIарасул сипат (сураталда).

  Гьев гIедегIулев вуго халкъалъухъе квешаб унтудаса инсан цIунулеб вакцинаялъул хIакъалъулъ хабар щвезабизе.

  ХIакъикъаталдаги заман щун буго, гIодоре риччан чIечIого, нилъго нилъецаго цIунизе, тохтурзабаз абуралъухъ гIенеккун, нилъерго сахлъи щула гьабизе. «ХIакъикъат» газеталъул редакциялъул хIалтIухъабазул 87 проценталъ вакцинация гьабуна. ГьабичIого хутIаралги, цо чи хутIизегIан, руго гьезул унтиялъе вакцина гьаби данде ккунгутIиялдалъун тохтурзабаз жал эркен гьарурал. Гьединлъидал нижеца киналго ахIула вакцина гьабизе. Щайгурелъул прививка гьабичIес гьеб унти гIадамазда гьоркьоб тIибитIизабизе ресал цIикIкIун ругелъул.

Нижер мухбир