ГьабсагIаталда халкъалъул 46 миллион чияс гурони вакцина гьабун гьечIо. Гьеб буго цIакъго дагьаб къадар. Гьединлъидал улкаялда коронавирусалде данде къеркьезе вакцина гьаби хIалуцинабизе ракIалда буго улкаялъул нухмалъулезда.

РФялъул сахлъи цIуниялъул министр Михаил Мурашкол рагIабазда рекъон, улкаялда вакцинаялъул рахъалъ щибго къварилъиги гьечIо.

«ХIажатаб къадаралда вакцина битIун буго щибаб регионалде. Гьединлъидал щивав чиясда тIадаб буго гьеб гьабизе. Гурони, унтулезул ва гьелъул хIасилалда холезул къадар цIакъго цIикIкIунеб буго. Вакцина гурони гьеб унтудаса цIунулеб цоги къагIидаги гьечIо», — ян бицана сахлъи цIуниялъул министрас.

19 октябралде ругел баяназда рекъон, цо сордо-къоялда жаниб улкаялда хъвай-хъвагIай гьабун буго 33740 унтарасул. Сахлъун вуго 23426 чи. Дагъистаналдайин абуни гьезул къадар бахуна 140 чиясде. Гьединлъидал нилъер щивасда тIадаб буго цIодорлъи гьабизе… Хадуб кватIун ккечIого букIине.Ахираб заманалда тIолабго улкаялдаго коронавирусалъ унтулезул къадар къо бахъанагIан цIикIкIунеб букIиналда бан, Россиялъул хIукуматалъул вице-премьер Татьяна Голиковалъ лъикIаблъун бихьизабуна 30 октябралдаса бахъараб анкьабилеб ноябралде щвезегIан гIодоркъоял лъазаризе кколин абун. Гьедин гьабиялъул мурадги буго гIадамал хIалтIуде рахъинчIого самоизоляциялда чIезари. Гьеб пикруялъул рахъ ккуна улкаялъул хIукуматалъул председатель Михаил Мишустиницаги Россиялъул президент В. Путиницаги.

«Унти тIибитIичIого букIиналъул мурадалда чара гьечIого гьабизе кколеб тадбир буго гьеб. Гурони, цIакъго гIемерлъизе руго унтаразул ва гьелъул хIасилалда холезул къадар», — ан абуна вице-премьералъ.

Гьединго гьелъ хIалтIикьолел ахIана хIалтIухъаби кIиго къоялъ рокъор тезеги, ай гьез вакцина гьабизе букIине. Гьелдаго цадахъ 60 ва тIадехун сонал рарал чагIи, ункъо анкьалъгIаги, чара гьечIого самоизоляциялда чIезаризе яги рикIкIадасан хIалтIулеб къагIида гьабизе кколинги лъазабуна Т. Голиковалъ.