Россиялъул тIасабищараб команда тIадбуссана Югалъул Кореялдаса
ЛъугIана Югалъул Кореялъул Пхенчхан шагьаралда тIоритIарал XXIII хасалил Олимпиялъул хIаял. Киналха гьел рукIарал Россиялъул тIасабищараб командаялъе? Хасалил спортивиял тайпабазул рахъалъ бищунго къуватал спортсменазул 20 процент гурого гьениб гIахьаллъичIолъи хIисабалде босани, хIасилал цIакъ лъикIал ккана. КIиго меседил, анлъго гIарцул ва ичIго мазгарул медалалгун тIадруссана Россиялъул спортсменал Олимпиадаялдаса. Абизе ккола, гьеб кIиябго месед нусгоялъул багьаяб букIанин. 26 сон букIана хоккеялъул рахъалъ Россиялъул тIасабищараб команда Олимпиялъул хIаязда бергьинчIого. Бащдаб финалалда чехалги ва финалалда Германиялъул командаги къезабун, нилъерал рахъана Олимпиялъул чемпионаллъун. 3:2 хIисабгун къолел рукIана россиялъулал немцаздаса, амма ахирияб минуталда Гусевас кьабураб голалъ рачана гьел овертаймалде. Овертаймалдайин абуни дандиязул кавабахъе «меседилаб шайба» кьабуна Россиялъул командаялъул бищунго гIолохъанав хоккеист Кирилл Капризовас. Меседил медалал кьолаго, Олимпиялъул бакъаналда гъоркь Россиялъул гимнги ахIана нилъер спортсменаз.
Пхенчханалъул Олимпиадаялъул аслияб спортивияб кIалгIа цIуралги дунялалдаго батIи-батIиял бакIазда телевизораздасан балагьарал гIадамалги хIайран гьаруна Россиялъул фигуристкаби Алина Загитовалъулгун Евгения Медведевалъул церерахъиназ. Алинаца Олимпиадаялда чIезабуна рекорд, гьелъие судьябаз кьуна жегиги цебеккун лъиего щвечIеб 239,57 балл ва яхъана чемпионкалъун. Медведева мустахIикълъана гIарцул медалалъе.
Пхенчханалъул Олимпиадаялда ккана Россиялъул тIасабищараб командаялъе рекIее захIматал цо-цо лъугьа-бахъиналги. Мисалалъе, керлингалъул кIигоял цадахъ хIалеб тайпаялда лъабабилеб бакIалъе мустахIикълъарал Александр Крушельницкийгун Анастасия Брызгалова Олимпиялъул комитеталъ медалаздаса махIрум гьаруна. Гьелъие гIиллалъунги ккана Крушельницкиясул бидулъ спортсменазе хIалтIизабизе гьукъараб мельдоний бати. Россиялъул спортсменасул рагIабазда рекъон, рехсараб препарат гьес цебеккун хIалтIизабун букIун гьечIо ва хасго керлинг гIадал чорхол къуват хIажалъуларел спортивиял тайпабазда гьелъ кумекги гьабуларо. Россиялъул тIасабищараб командаялъул тренераз абулеб буго спортсменасе мельдоний Олимпиялъул хIаязда кьун батизе кколин, гьебги спортсменал цадахъ кваналеб столоваялда. Кин букIаниги, гьеб хIужаялъ Россиялъул командаялда чIегIераб тIанкI лъуна. Гьеб лъугьа-бахъиналдаса хадуб допингалда дандечIараб халкъазда гьоркьосеб комитеталъул вакилзабаз ахIи балеб буго Россиялда дунялалъул даражаялъул киналгIаги спортивиял тадбирал тIоритIизе гьукъизе кколин, хIатта халкъазда гьоркьосел гIисинал къецалцин.
Бищунго мекъи ккараб жо буго спорт политикаялде сверулеб букIин. ГьабсагIаталда допинг хIалтIизабуларел спортсменал къанагIатги ратиларо, допингалда дандечIараб халкъазда гьоркьосеб комитеталъ гьукъичIеб чанги препарат буго чорхое къуватги кьолеб, къокъаб заманалда жаниб свакги чучулеб. Мельдонийин абуни допингцин кколаро. Гьелъ гIицIго къобихьараб, свакараб къаркъала, ракI рукIалиде бачIинабула, амма къуват бачIинабуларо.
ТIоцебесеб нухалъ гуро Америкаялъул Цолъарал Штатазул хIалкIвеялдалъун политикаги спортги жубазабулеб бугеб. 1979 соналда СССРалъ Афгъанистаналде рагъулал аскарал рачун хадуб СШАялъул ва бакътIерхьул цогидал пачалихъазул командаби рачIинчIо 1980 соналда Москваялда тIобитIараб Олимпиадаялда гIахьаллъизе. Ункъо соналдасан, ай 1984 соналъ Лос-Анджелесалде инчIо СССРалъул ва социалистияб блокалъул пачалихъазул спортсменалги. Доб заман ана, амма спорталда сверухъ долго политикиял хIаял лъугIун гьечIо. Гьебни гьедин букIаниги кIваричIоан, амма спорталъе гIумру кьурал атлетаз щиб гьабизе кколеб? Гьезда бугеб гIайиб щиб?
Футбол
Футболалъул рахъалъ Россиялъул чемпионаталъул 2017-2018 сезоналъул ихдалилаб бутIаялъул тIоцебесеб туралда 2 марталда Анжи-Аренаялда МахIачхъалаялъул «Анжи» хIазе буго Казаналъул «Рубин» командагун. ХIухьбахъиялъул заманалда абизегIанасел хиса-басиял ккечIо нилъер командаялъул мухъилъ, ай къуватал футболистал «Анжиялъ» мукIур гьаричIо. РакIариялъул заманалда тренераз аслияб кIвар кьолеб букIана командаялда гъорлъ церегоялдаса нахъе ругел футболистазул хIай дандеккезабиялде. ХIалбихьиялъул хIаязда гIезегIан берцинаб ва къуватаб футбол бихьизабулеб букIана анжиялъулаз. Гьединлъидал хьул буго иргадулаб сезоналдаги МахIачхъалаялъул команда премьер-лигаялда хутIилин. ГьабсагIаталда турниралъулаб таблицаялда «Анжи» 19 очкогун 15 бакIалда буго. Кинабниги Россиялъул чемпионаталда хIалеб буго 16 команда.
